Idman.biz
"Səbail"dən ayrılmağım peşəkar səbəblərlə bağlı idi. Premyer Liqada qalmağı karyeram baxımından daha uyğun hesab etdim. Klub rəhbərliyi ilə görüşdük və onlar da elitada çıxış etməklə bağlı qərarımı anlayışla qarşıladılar, razılığımız qarşılıqlı oldu".
İdman.biz xəbər verir ki, bu fikirləri Futbolinfo.az-a açıqlamasında qapıçı Hüseynəli Quliyev səsləndirib.
25 yaşlı futbolçu yeni klubu "İmişli"dən aldığı təklifin təxminən bir həftə əvvəl meneceri vasitəsilə gəldiyini bildirib: "Bu məsələni ətraflı müzakirə etdik və düşündük ki, gələcəyim üçün doğru addım olacaq. Hazırkı mərhələdə əsas məqsədim daha çox oyun praktikasına sahib olmaqdır. "İmişli"nin Azərbaycan futboluna daha geniş töhfə verməyi qarşısına məqsəd qoyması isə mənim üçün əlavə motivasiya oldu".
Komandadakı ilk təəssüratlarından danışan Quliyev yeni kollektivin çox səmimi və bir-biri ilə ünsiyyətli olduğunu vurğulayıb: "İlk gündən müsbət atmosfer hiss etdim. Premyer Liqaya yenicə vəsiqə qazanan klub olduğuna görə müəyyən çətinliklərin olması təbiidir. Amma zamanla hər şeyin düzələcəyinə və stabillik əldə olunacağına inanıram".
Gənc qapıçı yeni klubunda əsas heyətdə yer uğrunda mübarizə aparacağını da bildirib: "Əsas qapıçı olmaq üçün əlimdən gələni edəcəm. Həmişə sağlam rəqabət məni irəli aparıb. Belə şəraitdə həm fərdi inkişaf olur, həm də komanda güclənir. Bu da mənim üçün müsbət amildir".
O, məşqçilərin öz oyun fəlsəfələrini komandaya aşılamağa çalışdıqlarını deyərək, ortaq məqsədə çatmaq üçün hər kəsin məsuliyyətli davranmalı olduğunu qeyd edib: "Hər məşqçi uğur qazanmaq üçün sistemini və oyun baxışını futbolçulara ötürməyə çalışır. Biz də komanda olaraq verilən tapşırıqları düzgün yerinə yetirməliyik ki, uğurlu kollektiv formalaşsın".
Premyer Liqada ilk mövsümünü keçirəcək "İmişli"də məsuliyyətin hər bir futbolçunun üzərinə düşdüyünü bildirən Hüseynəli, şəxsi hədəflərindən də söz açıb: "Karyeramda mümkün qədər irəliləmək, daha yüksək səviyyələrə çatmaq istəyirəm. Legioner həyatı yaşamaq da planlarım arasında var. Milli komandaya dəvət almaq isə uşaqlıqdan bəri arzumdur. Ümid edirəm ki, futbolda qarşıma qoyduğum məqsədlərə çatacağam".
İdman.biz
