Sport24.az
"Qurban Qurbanov kollektivdə qapıçılarının sayını artırmaqla həm "çərçivə"də rəqabəti gücləndirir, həm də sabahı düşünür". Bu sözləri Sport24.az-a açıqlamasında Hüseyn Məhəmmədov deyib.
Təcrübəli qapıçı məşqçisi polşalı qolkiperin "Qarabağ"a fayda verəcəyini düşünür: "Hamı bilir ki, Qurban müəllim transfer xatirinə transfer etmir. Komandaya yeni qolkiper cəlb edibsə, demək ki, baş məşqçi onun qapıçı keyfiyyətlərini bəyənib. Düşünürəm ki, Mateuş Koxalski Ağdam təmsilçisinə fayda verən "çərçivə qoruyucusu"olacaq. Ağdam təmsilçisini həm avrokubok, həm çempionat, həm də kubokda ağır mübarizə gözləyir. Şahruddin Məhəmmədəliyevin sıradan çıxması, Sadiq Məmmədzadənin yetəri qədər təcrübəsinin olmaması Buntiçin tək qalması ilə nəticələnib. Bir qolkiperlə 3 cəbhədə mübarizə aparmaq olduqca çətindi. Sadiqin ötən turda debüt etməsi hamımızı sevindirir. Amma görünən odur ki, o təcrübə toplamaq üçün çox şans qazanmalıdı. Hazırkı dövrdə "Qarabağ"da hansı qapıçının "1 nömrə" olması özlərindən asılıdı. Kim üzərində daha çox çalışacaqsa, oyunlarda da soyuqanlı olub yaxşı performans sərgiləyəcəksə, o da əsas qapıçı olacaq".
Qeyd edək ki, "Qarabağ" Mateuş Koxalski ilə "3+1" şərti ilə müqavilə bağlayıb.
ABDULLA İSMAYILOĞLU
