Idman.biz
Hücumçu Rasmus Hoylundun "Mançester Yunayted"dən "Napoli"yə transferi İtaliya klubunun maliyyə problemləri səbəbindən baş tutmaya bilər.
İdman.Biz-in xəbərinə görə, bu barədə məlumat "X" sosial media platformasındakı "Uniteds Update" hesabında yayılıb.
Qeyd edək ki, danimarkalı hücumçu hazırda "Napoli"də icarədədir.
Hoylundun icarə müddəti cari mövsümün sonuna qədərdir. Müəyyən şərtlər yerinə yetirilərsə, "Napoli" 22 yaşlı hücumçunu almaq öhdəliyinə malikdir.
Hoylund İtaliya klubunda 19 oyun keçirib, yeddi qol vurub və üç məhsuldar ötürmə edib. Danimarkalı 2023-cü ilin yayından "Mançester Yunayted"də çıxış edir. Bu müddət ərzində o, bütün yarışlarda 95 oyun keçirib, 26 qol vurub və altı məhsuldar ötürmə edib.
Daha əvvəl bildirilirdi ki, "Mançester Yunayted" qış transfer pəncərəsində danimarkalı hücumçu Rasmus Hoylundu "Napoli"yə satmağı düşünür. İngilis klubu hücumçu üçün 38 milyon funt sterlinq (43 milyon avro) almaq niyyətindədir.
Hoylundun "Napoli" komandasına icarəyə verilməsi şərtlərinə 44 milyon avroluq satın alma variantı daxildir, lakin "qırmızı şeytanlar" müqaviləni ən qısa müddətdə yekunlaşdırmağa can atırlar.
Transfermarkt portalındakı məlumata görə, Hoylundun bazar dəyəri 45 milyon avrodur.
