Sport24.az
"Sumqayıt"ın futbolçusu Höccət Haqverdinin Sport24.az-a müsahibəsi
- Azərbaycan Kubokunun II təsnifat mərhələsində "Zaqatala"nı məğlub etdiniz. Oyun barədə nə deyə bilərsən?
- Qələbə qazandığımız üçün şadam. Dörd gün əvvəl oynadığımızı və bir neçə saatlıq səfər etdiyimizi nəzərə alsaq, bir qədər yorğun idik, amma komanda yoldaşlarımız bir-birinə kömək etdi və qarşılaşmadanqalib ayrıldıq.
- Səncə, I Liqa təmsilçiləri ilə Premyer Liqa klublarının səviyyə fərqi hiss olunur?
- Düşünürəm ki, keyfiyyət və şərait baxımından böyük fərq var, amma I Liqada bir-iki yaxşı komanda olduğunu da bilirəm. Ümumilikdə isə fərq hələ də çox böyükdür.
- Premyer Liqanın IX turunda səfərdə "Zirə"yə uduzmuşdunuz. Səncə, məğlubiyyətə səbəb nə idi?
- Rəqib ilk hissədə bizdən daha yaxşı oynadı və təəssüf ki, qol buraxdıq. Amma ikinci yarıda daha üstün idik və məncə, qol vura bilərdik. Fikrimcə, heç-heçə daha ədalətli nəticə olardı. Hər halda, "Zirə" yaxşı komandadır və keyfiyyətli futbolçuları var. Biz onlara bütün oyun ərzində cəmi iki real fürsət verdik, onlardan birini dəyərləndirdilər.
- "Sumqayıt" 9 turdan sonra 14 xalla 6-cı sıradadır. Bu nəticə sizi qane edir?
- Turnir cədvəlinə baxmaq üçün hələ tezdir. İndiyə qədər yaxşı xal toplamışıq, amma qarşıda hələ çox oyun var və xal fərqi azdır. Ümumilikdə isə bizim üçün hələlik hər şey yaxşı gedir.
- Növbəti turda yuxarı pillələrdə yer alan "Araz-Naxçıvan"la üz-üzə gələcəksiniz. Həmin matçdan gözləntin nədir?
- Araz-Naxçıvan" yaxşı komandadır, hücumda təcrübəli və güclü futbolçuları var. Təbii ki, çətin oyun olacaq, amma biz yaxşı nəticə qazanmaq üçün əlimizdən gələni edəcəyik.
- Səncə, "Sumqayıt" cari mövsüm nəyə nail ola bilər? Hədəf nə olmalıdır?
- Bilməliyik ki, azı 5-6 komanda büdcə və futbolçu keyfiyyəti baxımından bizdən üstündür və bu, faktdır. Bizim yaxşı futbolçularımız və heyətimiz var, amma bu, bəzi komandalarla rəqabət aparmaq üçün kifayət deyil. Fikrimcə, ədalətli rəqabət üçün ən azı 5-6 yeni futbolçuya ehtiyacımız var. Mövsüm uzundur, yorğunluq və zədələr olacaq, belə kasad heyətlə problemlərlə üzləşə bilərik və rəqabət çətin keçəcək. Biz həmçinin anlayırıq ki, klubun büdcəsi bir çox komandalardan daha məhduddur. Buna baxmayaraq, klub bizim üçün şəraiti maksimum dərəcədə yaxşılaşdırmağa çalışıb. Bütün bunlara rəğmən, indiyə qədər yaxşı nəticələr əldə etmişik və bunu davam etdirməyə çalışacağıq.
- Müxtəlif vaxtlarda Azərbaycan millisinə də dəvət almısan. Ayxan Abbasov baş məşqçi təyin edilib. Yenidən yığmada yer almaq istəyirsənmi?
- Milli komandaya çağırıldığım vaxtlarda həmişə uğur qazanmaq üçün əlimdən gələni etmişəm. Ayxan Abbasovla da işləmişəm və bilirəm ki, o, çox yaxşı məşqçidir. Üstəlik, futbolçularla münasibəti də çox yaxşıdır ki, bu da çox önəmlidir. Təəssüf ki, bu il mövsümöncəsi bütün hazırlıqları buraxmışam və düşünürəm ki, hələ formamın 50 faizindəyəm. Amma fiziki durumum hər gün yaxşılaşır və təbii ki, yenidən milli komandada oynamaq istərdim.
