Sport24.az
Misli Premyer Liqasının XXVIII turunda keçirilən "Kəpəz" – "Səbail" (1:1) matçından sonra meydan sahibi komandanın baş məşqçisi Azər Bağırov jurnalistlərin suallarını cavablandırdı. Sport24.az xəbər verir ki, mütəxəssis əvvəlcə oyunla bağlı fikirlərini bölüşdü:
– İki fərqli hissə oynadıq. İlk hissə daha yaxşı idik. İkinci hissədə isə əks-hücumlardan yararlana bilmədik. Qolu da standart vəziyyətdən yedik. Yəqin ki, asanlıq istəmirik… Bu oyunda qələbə qazanıb, daha rahat ola bilərdik.
– "Neftçi"ni, "Sabah"ı uda, "Qarabağ"dan xal ala bilirsiz. Amma "Səbail"i uda bilmirsiz…
– Həmişə belə oyunlarda psixoloji gərginlik olur. Ona görə də komanda "Qarabağ", "Neftçi" və "Sabah"la daha rahat oynayır. Burada isə xal itirməkdən qorxurlar.
– Yeni transferləri hansı istiqamətdə aparırsınız?
– Sırf mərkəz müdafiəçi ilə bağlı problemimiz var idi. Bu gün İlkin Qırtımov zədəli şəkildə meydana çıxdı. Yerli oyunçu sarıdan kifayət qədər problemlərimiz var.
– 90 dəqiqəni eyni tempdə keçirməyə nə mane olur?
– Hər iki hissəni eyni tempdə keçirdik. Sadəcə ikinci hissədə əks-hücumlardan yararlana bilmədik. Hansı ki, Trentin ikiyə bir getdiyi epizod buna nümunədir. O mənada əsas iki fərqli hissə izlədik.
– "Sumqayıt"a məğlubiyyətdən sonra dediz ki, komanda daxili problemlər var. Həmin problemlər nə idi?
– Komanda daxili problemlərdən danışmağa dəyməz. Sadəcə futbolçulara siqnalım var idi. Onlar da buna riayət etdilər. Hesab edirəm ki, komanda daxili problemlər bizimlə qəbirə qədər getməlidir.
– Xvalkonu ehtiyatda saxlayıb, İlkini startda oynatmağınız nəyə görədir?
– "Qarabağ"la oyunda İlkin daha yaxşı çıxış etdi. Həm limitə görə belə seçimlər etdik. Əgər İlkin arxada olmasaydı, Anuşu irəlidə oynada bilməzdik.
– Düşünmürsüz ki, Xvalkoya mənfi təsir edər?
– Xeyr. Xvalko komandanı sevir. Bu gün İlkini arxada oynatmaqla, rotasiyalar edə bilirik. Yaxud da qabağda yerli oyunçuları oynatmaqla, arxada çətinlik çəkirik
– Klubda problemlər davam edir?
– Xeyr, problemlər yoxdur. Sadəcə nəticə məni məyus edir. 1 səhv və 1 qol. Şükürlər olsun ki, heç bir problemimiz yoxdur. Zaman daraldıqca, oyunçular daha məsuliyyətli olmalıdır. Qarşıda 8 tur var. Hələ heç nə bitməyib. Gəncədə böyük futbol qalmalıdır.
– Sizcə elitada qalmaq üçün 5 xal nə qədər avantajdır?
– Böyük avantaj deyil. 2 oyun uduzub, bunu itirə bilərik.
