Həbib Ağayev: "Daha yaxşı nəticələr göstərmək üçün beynəlxalq matçların sayını artırmalıyıq"

"İlk matçda üz-üzə gəldiyimiz Şimali İrlandiya çox güclü idi. Nəinki bizə 4 qol vurdular, turnirdə bütün komandaların hamısını böyük hesabla məğlub etdilər. Ən zəif oyunumuzu Albaniyaya qarşı keçirdik. Əslində hesab 0:4 olmamalı idi. Komanda oyuna normal başlamışdı. İlk hissədə hesab 0:1 idi. Sadəcə, sona qədər köklənə bilmədik. Çox yersiz qollar buraxdıq. Son matçda Monteneqro ilə qarşılaşdıq. Hansı ki, turniri ikinci yerdə başa vurdular. Hesab 1:2 olanda bir neçə qol vəziyyəti yaratdıq. Bu oyunlar komandamızın təcrübə qazanması üçün yaxşı oldu. Ümumilikdə futbolçular bacardıqlarının ən yaxşısını ortaya qoydular". Sport24.az xəbər verir ki, bu sözləri AFFA-nın rəsmi saytına açıqlamasında Azərbaycanın 19 yaşadək qadınlardan ibarət millisinin baş məşqçisi Həbib Ağayev deyib.

Mütəxəssis Avropa çempionatının II seçmə mərhələsində keçirdikləri oyunları dəyərləndirib:

"İrlandiya bizim 0:4 uduzduğumuz komandaya 5, Monteneqroya 3 qol vurdu. Şimali İrlandiya ilə matç istisna olmaqla digər görüşlərdə hesab oyuna görə olmadı. Oyundan-oyuna durumu düzəldirdik. Avropa çempionatına qatılmamışdan əvvəl Belarusda toplanış və iki yoxlama matçı keçirmiş, oyun üslubumuzu formalaşdırmışdıq. Düşünürəm ki, daha yaxşı nəticələr göstərmək üçün beynəlxalq matçların sayını artırmalıyıq. Bu gün potensialımıza görə ən yaxşısını etdiyimizi deyə bilərəm. Xüsusən də sonuncu - Monteneqro ilə oyun, uduzmağımıza baxmayaraq, xoşuma gəldi. Futbolçularımız rəqibə çox qol vəziyyətləri yaratmağa imkan vermədilər".

Baş məşqçi komandada ciddi dəyişikliklərin olacağını vurğulayıb:

"Əslində Avropa çempionatının seçmə mərhələ oyunlarını apreldə keçirməliydik. Müəyyən səbəblərə görə matçlar bu aya salındı. Növbəti yarış sentyabrda olacaq. Arada böyük fasilə var. Yaşla bağlı heyətin demək olar yarısı dəyişəcək. Komanda yığmaq, futbolçuları oyun üslubumuza öyrəşdirmək lazım olacaq".

Qeyd edək ki, Avropa çempionatının II seçmə mərhələsinin B qrupunda yer alan Azərbaycanın U-19 millisi Şimali İrlandiya və Albaniyaya 0:4, Monteneqroya isə 1:2 hesabı ilə məğlub olub.