Idman.biz
Türkiyənin "Qalatasaray" klubunun sabiq futbolçusu və keçmiş baş məşqçi köməkçisi Hasan Şaş "Qaziantep" ilə 1:1 hesabı ilə başa çatan oyun barədə kəskin açıqlamalar verib.
İdman.Biz xəbər verir ki, Hasan Şaş qarşılaşmanı "SporON" platformasında dəyərləndirib. O, Qalatasarayda ciddi plansızlıq və xaosun hökm sürdüyünü bildirib.
Hasan Şaşın sözlərinə görə, mövcud şəraitdə heç-heçə nəticə ilə barışmaq olar. Onun fikrincə, daha əvvəl "Atletiko Madrid"lə oyunun transfer siyasətinə ciddi təsir göstərəcəyi müzakirə edilsə də, hazırkı durumda əsas problem start heyətin formalaşdırılmasında yaşanan çətinliklərdir. Şaş vurğulayıb ki, əgər əsas heyətdə məcburi və süni dəyişikliklər edilirsə, bu, böyük plansızlığın göstəricisidir.
Sabiq futbolçu Vilfrid Sinqonun durumuna da xüsusi toxunub. Hasan Şaş bildirib ki, "Qalatasaray" azarkeşləri hazırda futbolçunun niyə oynamadığını anlaya bilmir. Onun sözlərinə görə, Sinqo son oyununu noyabrın 5-də keçirib və yanvarın 17-si olmasına baxmayaraq hələ də meydanda görünmür. Şaş bu vəziyyətin səbəbinin izah olunmadığını qeyd edərək, futbolçunun niyə heyətdə olmadığını açıq sual kimi gündəmə gətirib.
Digər tərəfdən, Hasan Şaş Viktor Osimhenin qayıdışından sonra Mauro İkardinin ehtiyatda qalacağını iddia edib.
Şaş "Qaziantep" ilə matçda stadiona gələn azarkeşlərə də reaksiya verib:
"Stadiona gələn azarkeşlər bir də oyuna gəlməsin. Belə azarkeşlik olmaz. Stadiona gəlib şəkil çəkməklə azarkeş olmur. Mən sizə bir böyük qardaşınız kimi deyirəm, artıq tək hədəf qarşıdakı oyundur, evdə oynanacaq "Fənərbağça" matçı. Uduzsanız, bu mövsüm bayraqları yığışdırın".
