Idman.biz
Türkiyənin "Qalatasaray" komandasının sabiq oyunçusu, indi idman şərhçisi olan Hasan Şaş Superkubokun finalında keçmiş komandasının "Fənərbağça"ya 0:2 hesabı ilə uduzmasını sərt şəkildə tənqid edib.
İdman.Biz xəbər verir ki, SporON kanalında danışan Şaş "Qalatasaray"ın oyuna yaxşı hazırlaşmadığını və konsentrasiya problemi yaşadığını bildirib. Onun sözlərinə görə, komanda matça həm fiziki, həm də psixoloji baxımdan hazır olmayıb.
"İkardinin qarşılamalı olduğu künc zərbəsi ancaq belə olar. O qolla matç bitdi. "Qalatasaray" pis oynadı. Düşünürəm ki, baş məşqçi Okan, həm də futbolçular bunu qəbul edəcək", - deyə Şaş bildirib.
Şərhçi qapıçı seçimini də tənqid edib:
"Əgər qapıda Uğurcan Çakır olsaydı, ssenari fərqli ola bilərdi. "Qalatasaray" final oynayır, "Fənərbağça" ilə oynayır. Komandanın ən bahalı oyunçularından biri oynamır. Genduzinin vurduğu zərbə adi bir liberonun oradan vuracağı zərbədir. Uğurcan Çakır o topu çıxara bilərdi. "Fənərbağça" ilə oynayırsansa, qapıda Uğurcan olacaq, vəssalam".
Şaş əlavə edib ki, problemin kökü daha dərindir:
"Mən hər şeyi qapıçıya və ya fərdi səhvlərə bağlamaq istəmirəm. Bu, "Kocaelispor" matçından bəri gələn bir məsələdir. Oyunda konsentrasiya olmadıqları açıq görünür. Bu da matça yaxşı hazırlaşmamaqdan irəli gəlir".
Hasan Şaş sonda vurğulayıb ki, "Qalatasaray" reallıqla üzləşməlidir:
"Bu nə Osimhen məsələsidir, nə də Sinqo. "Qalatasaray" gerçəklərlə üzləşməlidir. "Monako" və "Yunion" oyunlarından bir xal alsaydın, "Atletiko Madrid" matçını belə müzakirə etməzdik. Finala çıxırsansa, 100 faiz konsentrasiya ilə çıxmalısan. Rəqib səndən 300 faiz daha çox köklənirsə, problem var. Futbolçular matç seçir, stadion seçir, öz komfort zonalarına görə oynamaq istəyirlər. Bu belə olmaz. Qarşıda "Atletiko Madrid" oyunu var və ondan sonra da çox ciddi matçlar olacaq. Biləcəksən ki, "Fənərbağça" səndən daha çox qaçacaq və ona görə oynayacaqsan".
