Idman.biz
İngiltərə millisi Uelslə qarşıdan gələn yoldaşlıq görüşündə aparıcı oyunçusundan məhrum ola bilər.
İdman.biz-in "The Independent"ə istinadən verdiyi xəbərə görə, Harri Keyn ötən həftə sonu "Bavariya"nın "Ayntraxt"la (3:0) keçirdiyi matçda topuqdan aldığı zədə səbəbindən komandasının məşqini buraxıb.
32 yaşlı hücumçu həkimlər briqadasının nəzarəti altında fərdi bərpa proqramını tamamlasa da, qrupun digər üzvləri ilə birlikdə meydana çıxmayıb. Milli komandaya yaxın mənbələr Keynin zədəsinin ciddi olmadığını iddia edirlər. Lakin onun bəxti vaxt baxımından gətirməyib - qarşıda ikiqat beynəlxalq dövrə var.
"Ayntraxt"la oyundan sonra Keyn azarkeşləri sakitləşdirməyə çalışaraq deyib: "Bir zərbə aldım, amma artıq sağalıram. Bir neçə günə hər şey yaxşı olacaq və bazar ertəsi milli komandaya qayıdacağam".
İngiltərə yığmasının kapitanı Uelslə oynaya bilməsə, Tomas Tuxel əvəzedici axtarmağa məcbur olacaq. "Aston Villa"nın oyunçusu Olli Uotkins əsas namizəd hesab olunur. Lakin məşqçi Entoni Qordon və ya Markus Raşforddan da istifadə edə bilər.
Müvəqqəti sağlamlıq problemlərinə baxmayaraq, Keyn yeni rekordlar üçün səylərini davam etdirir. O, artıq ölkəsinin heyətində 74 qol vurub və 109 oyun keçirib ki, bu da onu milli komandada ən çox oyun keçirən Piter Şiltonun rekorduna yaxınlaşdırır. Hücumçu Uelslə oyunu buraxsa belə, oktyabrın 14-də Latviya ilə keçiriləcək dünya çempionatının seçmə oyununa vaxtında hazır olmalıdır.
