Idman.biz
Malta çempionu "Hamrun" Avropa kuboklarında maraqlı nəticə ilə yadda qalıb.
İdman.biz xəbər verir ki, komanda 2025/2026 mövsümündə keçirdiyi 6 oyunun 5-də uduzsa da, mübarizəni davam etdirir.
Maltalılar avrokuboklarda pley-off mərhələsi öncəsi ən çox uduzan komandadırlar. Mübarizəyə Çempionlar Liqasının I təsnifat mərhələsindən start verən "Hamrun"la "Jalgiris" (Litva) arasında hər iki görüş ev sahiblərinin 2:0 hesablı qələbəsi ilə yekunlaşıb. Nəticədə qalib penalti seriyasında müəyyənləşib və Malta klubu mərhələ adlayıb. Amma II mərhələdə Kiyev "Dinamo"su ilə oyunlar 0:3 hesablı məğlubiyyətlərlə yadda qalıb.
Bundan sonra mübarizəni Avropa Liqasının III təsnifat mərhələsində davam etdirən "Hamrun" bu dəfə hər iki oyunda "Makkabi"yə (Təl-Əviv) uduzub - 1:2, 1:3. Malta çempionu Konfrans Liqasının pley-offundakı rəqibi RFS (Latviya) olacaq. "Spartalılar" uğurlu nəticə sayəsində turnirin Liqa mərhələsinə vəsiqə qazanmaqla ölkə futbolu tarixində ilkə imza ata bilərlər. İndiyədək Maltanın heç bir klubu nəinki həlledici mərhələ, heç pley-offda oynamaq imkanı əldə etməyib.
Qeyd edək ki, "Hamrun"la RFS arasında ilk görüş avqustun 21-də Maltada, cavab matçı isə ayın 28-də Latviyada olacaq.
İdman.biz
