Sport24.az
Neçə gün idi istər sosial şəbəkələrdə, istərsə də mətbuatda mövsümün sonunda elitanı neçə komandanın tərk edəcəyi, pley-offun olub-olmayacağı barədə müzakirələr gedirdi. Əksəriyyət pley-off variantının düzgün olmadığını, minimum 3 milyonluq büdcəyə malik Premyer Liqa klublarının heyət baxımından I Liqa təmsilçilərindən üstün olduğunu söyləyirdi. Bu cür düşünənlər nümunə kimi ölkə kubokunun ilkin mərhələsini göstərir, səviyyə fərqini qabardırdı.
Dünən nəhayət ki, qaranlıq məqamlara aydınlıq gəldi. AFFA İcraiyyə Komitəsinin iclasında yeni mövsümün formatı ilə bağlı yekun qərar qəbul olunub. Qərara görə, Premyer Liqanın sonuncusu istənilən halda I Liqaya düşəcək. Bu üzdən istər cari mövsümdə, istərsə də qarşıdakı illərdə turnir cədvəlinin alt pillələrində yer alan komandalar arasında ölüm-qalım savaşı gedəcək ki, bu da çempionata marağı bir qədər də artıracaq.
İcraiyyə Komitəsinin üzvləri bəlkə də son illərdə ən düzgün addımı atmaqla yadda qaldılar. Həm idman, həm də ədalət prinsipi qorundu. Buna görə futbolumuzun indiki başbilənlərini alqışlamaq lazımdı.
12 komandalı çempionatın hansı formatda keçiriləcəyi də əsas müzakirə mövzularından biri idi. "6-lıq" keçilmiş yol olduğundan və "ikinci eşalonda" yer alacaq komandalara manevr imkanı yaratmamaq üçün 3-cü dövrədə ev sahibinin püşk yolu ilə təyini mümkün variantlar arasında ən düzgünü idi.
I Liqada ilk 3 yeri tutan komandanın birbaşa Premyer Liqaya yüksəlməsi də təqdirə layiq addımdı. O başqa məsələ ki, hələ də I Liqada infrastruktur baxımından axsayan klublar var. İstisna kimi yalnız "Qəbələ"ni göstərmək olar. Ancaq istənilən halda ilk addım atılmalı idi. Bu prinsipə riayyət olunduqca isə, aşağı dəstə komandaları da peşəkarlıq baxımından Premyer Liqa səviyyəsinə çatacaq. Düzdü, buna bir neçə il lazımdı. Ancaq necə deyərlər, könülü balıq istəyənin quyruğu suda olmalıdı. Ölkədə futbolun ümumi səviyyəsini yüksəltmək naminə ilk vaxtlar bəzi çatışmazlıqları ötürmək olar.
Eyni zamanda I Liqa və II Liqa ilə bağlı qərarlar da inkişafa yönəlmiş addımdı.
