Idman.biz
"Qarabağ"da mənə daha çox şans versəydilər, özümü daha yaxşı göstərə bilərdim".
Bunu "Araz-Naxçıvan"ın fransalı futbolçusu Hamidu Keyta teleqraf.az-a müsahibəsində bildirib.
Həmin müsahibəni təqdim edirik:
– Hazırda karyeranız necə davam edir?
– Özümü burada çox yaxşı hiss edirəm. Buradakı insanları, xalqı çox sevirəm. Azərbaycan mənim üçün yad ölkə deyil.
– Bakıda yaşam tərziniz necədir?
– Burada özümü azərbaycanlı kimi hiss edirəm. Sadəcə, azərbaycanca bilməməyim bir az çətinlik yaradır. Hamı deyir, öyrən, mən də gələcəkdə buna çalışacağam. Küçələrdə təhlükəsizlik xoşuma gəlir, insanlar yaxşıdır, ölkə təhlükəsizdir. Burada bir neçə dostum var və onlara deyirəm ki, Azərbaycana gəlsələr, xoşbəxt ola bilərlər.
– Azərbaycanda əvvəl "Zirə"də, daha sonra "Qarabağ"da çıxış etmisiniz.Türkiyənin "Konyaspor" klubuna yollansanız da, yenidən yay fasiləsində geri qayıtdınız. Bəs, necə oldu ki, "Araz-Naxçıvan"ın təklifiniz qəbul etdiniz?
– Ötən mövsüm "Araz-Naxçıvan"ın çıxışını izləmişdim. Komanda Konfrans Liqasına vəsiqə qazanmışdı. Baş məşqçi ilə də danışdım və düşündüm ki, bu il daha çox imkanlar olacaq. Beləliklə, təklifi qəbul edib gəldim.
– Bəs meydanda az görünməyinizin səbəbi nədir?
– Bizim komandada çox futbolçu var. Düşünürəm ki, mənim də vaxtım gələcək. Hazırda fiziki baxımdan yaxşı vəziyyətdəyəm. İnanıram ki, özümü daha yaxşı tərəfdən göstərib oyun şansı qazanacağam.
– "Qarabağ"da olarkən daha çox şans qazansaydınız, komandaya kömək edə bilərdiniz?
– Təbii ki, "Qarabağ"da mənə daha çox şans versəydilər, özümü daha yaxşı göstərə bilərdim. Amma orada keyfiyyətli futbolçular çox idi. O dönəm artıq keçmişdə qaldı. İndi "Araz-Naxçıvan"dayam.
– Qurban Qurbanovdan və "Qarabağ"da qazandığınız təcrübə sizə nə dərəcədə kömək edir?
– Həyatım boyu bir çox komandada oynamışam, təcrübəm kifayət qədər zəngindir. İndi isə daha çox kollektiv uğuru önə çəkməliyəm. Məsələn, mən xoşbəxt olmasam belə, əsas olan komandanın uğur qazanmasıdır.
– Bəs Qurban Qurbanovu necə xatırlayırsınız?
– O, böyük məşqçidir. Hər bir futbolçu üçün onun kimi baş məşqçinin rəhbərliyi altında oynamaq böyük təcrübədir. Fərqli oyun baxışı var. Məsələn, Qurban müəllimdə bir cür, Elmar Baxşıyevdə isə başqa cür yanaşma var.
– Sabiq klubunuz "Qarabağ" UEFA Çempionlar Liqasının əsas mərhələsində çıxış edir. Bu barədə fikirləriniz necədir?
– Onlara görə sevinirəm. Bu komanda Çempionlar Liqasında oynamağa tam layiqdir. Ümid edirəm ki, növbəti oyunlarda qələbə qazanacaqlar. "Qarabağ" Avropaya göstərir ki, Azərbaycan klubu ölkə xaricində nələrə qadirdir.
– Rəqiblərdən hansını tanıyırsınız?
– Onlar bu mərhələyə gəliblərsə, deməli, daha artığını da edə bilərlər. Heç kim, o cümlədən mən də "Benfika"nı məğlub edəcəklərini gözləmirdim. Bu yerə gəlib çatmaqla göstərirlər ki, bacarıqları var.
– "Atletik" Bilbaoya 1:3 hesablı məğlubiyyət barədə nə deyərdiniz?
– Bu, böyük turnirdir və rəqiblər təsadüfi komandalar deyil. "Atletik" İspaniyanın adlı-sanlı klubudur. Belə turnirlərdə bir oyunu uda, digərində uduza bilərsən.
– Bu yaxınlarda Azərbaycan millisi DÇ-2026-nın seçmə mərhələsində Fransa ilə qarşılaşaraq 0:3 hesabı ilə məğlub oldu. Həmin görüş barədə fikirləriniz də maraqlıdır...
– Azərbaycan müdafiə olunmağı yaxşı bacardı. Amma Fransanın hücumçuları sanki sənət əsəridir. Azərbaycan yığması isə hər şeyini meydanda qoydu və yaxşı mübarizə apardı.
– Bakıdakı cavab oyununu canlı izləyəcəksinizmi?
– Təbii ki, düşünürəm. Çalışacağam oyunu stadiondan canlı izləyim.
– Şansları necə dəyərləndirirsiniz?
– Fransa çox güclü komandadır, onları udmaq çətindir. Yenə də bu, futboldur. Əvvəldən praqnoz vermək doğru çıxmaz.
