“Hakimliklə bağlı sualları cavablandırmıram"

Azərbaycan Premyer Liqasının XXIII turunda "Turan Tovuz" – "Araz-Naxçıvan" (1:0) matçından sonra meydan sahibi komandanın baş məşqçisi Kurban Berdıyev jurnalistlərin suallarını cavablandırıb. Sport24.az xəbər verir ki, mütəxəssis əvvəlcə görüşlə bağlı fikirlərini bölüşüb:

– Oyun barədə danışsaq, ilk hissədə futbolçularım bir qədər yanıldılar. Çətin amma vacib qələbə idi. Futbolçularımı təbrik edirəm.

– Roderik Miller və Şəhriyar Əliyevin sıradan çıxmasından sonra komandada geriləmə hiss edirsiz?

– Tam olaraq belə deməzdim. Denis Marandiçini də bura əlavə edərdim. Bu, hər zaman belədir. Yeni gələn oyunçuların komandaya uyğunlaşması zaman alır.

– Bu itkilər sizin strategiyanızı dəyişməyə məcbur edir?

– Bəli, müəyyən dəyişikliklər olur. Amma ən azından futbolçuların bir-birini başa düşməsi üçün vaxt lazımdır.

– Kristian da Silvanın əsas heyətdə olmaması limitlə bağlı idi?

– Bəli.

– İsmayıl Zülfüqarlı sol cinah müdafiəçisi kimi sizi nə dərəcədə razı salır?

– Planlaşdırırdıq ki, Rüfət Əhmədovu ikinci hissəyə saxlayaq, ilk hissədə İsmayılın aktivliyindən istifadə edək. Amma gözlədiyimiz aktivliyi görmədik.

– Sizdən əvvəl həmkarınız Elmar Baxşıyev bildirdi ki, "qırmızılıq" epizod deyildi. Siz nə düşünürsüz?

– Bildiyiniz kimi hakimliklə bağlı sualları cavablandırmıram. Ona qalsa, bundan öncəki matçlarda da bizim əleyhimizə qərarlar olmuşdu.