Sport24.az
"Şamaxı"nın bu yay "rənglərinə bağladığı" Giorgi Kantariya Sport24.az-a müsahibə verib. Gürcü yarımmüdafiəçi "Zirə" ilə oyundandan danışmaqla yanaşı, qarşıdakı tur barədə də fikirlərini bölüşüb.
- Ötən həftə səfərdə "Zirə"ni məğlub etdiz. Oyunla bağlı fikirlərini bölüşərdin...
- "Zirə" güclü komandadı. "Omoniya" ilə səfər oyununu nəzərə almasaq, başqa görüşlərdə özlərini yaxşı tərəfdən göstərə biliblər. Hazırlığı bizdən tez başladıqlarından Rəşad Sadıqovun komandası yaxşı formadadı. Çətin oyun olacağını bilirdik. Buna baxmayaraq, sonadək mübarizə aparıb güclü rəqib üzrəində vacib qələbə qazandıq.
- Yeni qurulan komanda olsaz da, mövsümə heç də pis başlamamısız...
- Heç kimdən zəif olmadığımızı göstərmək istəyirik. Ən böyük motivasiyamız budur. Həmçinin "Şamaxı"da yaxşı mühit var, bir ailə kimiyik. Pozitiv mühitdə oyunlara yaxşı əhval-ruhiyəylə hazırlaşır və qarşılaşmalarda qələbəyə köklənirik.
- Bundan qabaq "Kəpəz"də başqa məşqçinin rəhbərliyi altında oynamısan. Bu gün isə Ayxan Abbasovun sərəncamındasan. Onu baş məşqçi kiki necə xarakterizə edərdin?
- Hələ "Kəpəz"də oynayanda Ayxan Abbasovun "Turan Tovuz"da yaratdığı şəraitə, döyüşkən futbol fəlsəfəsinə və futbolçu seçiminə simpatiyam vardı. Azad agent olduğum vaxtda Ayxan müəllim mənə zəng edib, "Şamaxı"da dəvət etdi və təklifə müsbət reaksiya verdim. Onun rəhbərliyi altında oynamaq məsuliyyətli olduğu qədər də xoşdu. İnanıram ki, Ayxan müəllimlə birlikdə yaxşı nəticələr qazanacağıq.
- Növbəti tur "doğma divarlar" arasında "Neftçi"ni qəbul edəcəksiz. Bu gün heç də yaxşı günlərini yaşamayan "Neftçi"dən xal və ya xallar almaq çətin olmayacaq?
- Azərbaycan futbolunun ən köklü klubuna qarşı oynamaq həmişə böyük məsuliyyət tələb edir. İnanıram ki, onlarla görüşdə də istədiyimiz nəticəni əldə edə biləcəyik. Əslində bütün komandalara hörmətlə yanaşırıq. Hər oyundan öncə rəqibləri ciddi təhlil edir, onların üstün və zəif cəhətlərini öyrənməyə çalışırıq. "Neftçi" cari mövsümdə hələ qələbə qazana bilməyib. Bu üzdən bizimlə oyuna 3 xal üçün çıxacaq, aqresiv olacaqlar. Bu məqam hardasa bizim işimizə yaraya bilər.
ABDULLA İSMAYILOĞLU
