Idman.biz
"Neftçi" və "Qarabağ"ın sabiq hücumçusu Georgi Adamiyanın futbolinfo.az saytına müsahibəsi
– "Neftçi" Azərbaycan Kubokunda finala çıxa bilmədi. Bu nəticəni gözləyirdiniz? Cari mövsümü "ağ-qaralar" üçün fiasko adlandırmaq olar?
– Təəssüf ki, cari mövsüm "Neftçi" üçün uğursuz alındı. Komanda kubokun finalına çıxa bilməməklə avrokuboklara vəsiqə qazanmaq şansını da itirdi. "Neftçi"nin sabiq futbolçusu olaraq, bu, mənim üçün çox üzücü haldır.
– Necə düşünürsünüz, baş məşqçi Samir Abasovla növbəti mövsümdə də yola davam edilməlidir, yoxsa onunla əməkdaşlığı dayandırmaq "Neftçi" üçün daha faydalı olar?
– Nəzərə alaq ki, hazırkı heyəti Samir Abasov komplektləşdirməyib. Yeni mövsümöncəsi komandanı Samir özü komplektləşdirəndən sonrakı nəticələri görərək, bu barədə danışmaq, onun qalmalı və ya getməli olduğu haqda fikir yürütmək olar.
– Kubokun finalında "Qarabağ" və "Sabah" komandaları üz-üzə gələcək. Şansları necə dəyərləndirirsiniz?
– "Sabah" yaxşı komandadır. Üstəlik, final bir oyundan ibarətdir. Bu o deməkdir ki, hər şey baş verə bilər. Amma yenə də "Qarabağ"ın kuboku qazanacağını düşünürəm.
– Cari mövsümdə hansı komandanın çıxışı sizi müsbət mənada təəccübləndirdi?
– "Zirə"ni qeyd edərdim. Bu komandanı çox bəyənirəm. Hazırkı "Zirə" yetərincə yaxşı komandadır.
– Hazırda Azərbaycan Premyer Liqasında 4 gürcü futbolçu – Davit Volkov, Giorgi Papunaşvili, Rati Ardazişvili və Giorgi Karaişvili çıxış edir. Onların çıxışını diqqətdə saxlayırsınız? Sizcə, həmyerliləriniz Azərbaycanda özlərini yaxşı tərəfdən göstərə bilirlər?
– Bəli, diqqətdə saxlayıram. Ardazişvili "Kəpəz"in, demək olar ki, bütün oyunlarında iştirak edir. Papunaşvili və Volkov da "Zirə"də çox oyun dəqiqəsi qazanır və özlərini pis göstərmirlər. Karaişviliyə gəlincə, o da yaxşı futbolçudur, ancaq "Sumqayıt"da sözünü hələ tam deyə bilmir. Mən onu yaxşı tanıyıram. Karaişvilinin böyük potensialı var. Buna görə də hazırkından daha yaxşı performans sərgiləməlidir.
– Hazırda Azərbaycan Premyer Liqasında baş məşqçi kimi çalışanların əksəriyyəti ilə vaxtilə komanda yoldaşı olmusunuz. Qurban Qurbanov, Rəşad Sadıqov, Ayxan Abbasov, Samir Abasov, Elmar Baxşıyev, Vaqif Cavadov və Elvin Məmmədovu nəzərdə tuturuq. Onların məşqçi kimi rəqabətini izləmək sizə maraqlı gəlirmi?
– Düz qeyd etdiniz, onların hər biri ilə vaxtilə komanda yoldaşı olmuşam. Çox şadam ki, futbolda qaldılar. Hər birinə məşqçilik karyerasında uğur arzulayıram. Təbii ki, dostlarımın, sabiq komanda yoldaşlarımın işinə diqqət yetirmək, onlar arasındakı rəqabəti izləmək mənim üçün çox maraqlıdır.
İdman.biz
