Idman.biz
"Yeni mövsümdən legioner limitinin ləğvi çempionatda ciddi rol oynayacaq. Uğur qazanmaq yalnız düzgün transferlərlə mümkün olacaq. Keyfiyyətli oyunçular alan komandalar daha yaxşı nəticə göstərəcək. Bu səbəbdən qarşıdakı mövsümün çox çətin keçəcəyini düşünürəm".
İdman.biz xəbər verir ki, bu sözləri AZƏRTAC-a açıqlamasında "Neftçi"nin və Azərbaycanın U-18 millisinin sabiq baş məşqçisi Füzuli Məmmədov Misli Premyer Liqasında bu gün start götürəcək 2025-2026-cı illər mövsümü ilə bağlı danışarkən deyib.
Mütəxəssis çempionluq və avrokuboklar uğrunda mübarizədə favorit hesab etdiyi komandaların adlarını sadalayıb: "Komandalarımızın yoxlama görüşlərində və avrokuboklarda keçirdikləri oyunları izləyirəm. Fikrimcə, çempionluğa əsas namizədlər "Qarabağ" və "Sabah"dır. Lakin transferlərə nəzər yetirsək, "Neftçi"nin də adını çəkmək olar. Bununla yanaşı, "Zirə" və "Turan Tovuz"un da iddialı olduğunu qeyd etmək lazımdır. Avrokuboklara vəsiqə uğrunda isə "Araz-Naxçıvan", "Zirə" və "Turan Tovuz" klubları mübarizə aparacaqlar. Bu komandalar, eləcə də "Şamaxı" mövsümün sonunda ilk "altılıq"da yer ala bilər. "Şamaxı"nın maliyyə imkanları məhdud olsa da, baş məşqçi işi buna imkan yaradacaq".
Təcrübəli mütəxəssis "Kəpəz", "Qəbələ", "İmişli", "Karvan -Yevlax" və "Sumqayıt"ın isə əsasən liqada qalmaq uğrunda mübarizə aparacağını vurğulayıb: "Bu komandaların yeni mövsümə hazırlıq məqsədilə keçirdiyi qarşılaşmaları izləmək imkanım oldu. Müşahidələrimə əsasən, "Sumqayıt" və "Şamaxı"nın digərlərindən müsbət mənada fərqləndiyini deyə bilərəm. Sumqayıt təmsilçisi mövsümün sürpriz komandalarından biri ola bilər. "Qəbələ"də baş məşqçinin işi təqdirəlayiqdir, amma uğurlu çıxış üçün bəzi mövqelərə mütləq transferlər lazımdır. Əks halda, istənilən nəticəni əldə etmək çətin olacaq. I Liqaya düşəcək komandaları indidən demək çətindir. Çempionat davam etdikcə və oyunlar artdıqca, daha dəqiq fikir yürütmək mümkün olacaq".
Qeyd edək ki, Misli Premyer Liqasında yeni mövsümə avqustun 15-də start veriləcək.
İdman.biz
