Sport24.az
"Mingəçevir" komandasının baş məşqçisi Füzuli Məmmədovun Sport24.az-a müsahibə verib.
- I Liqanın sonuncu turunda MOİK-ə qalib gəldiniz. Oyunla bağlı fikirlərinizi bölüşərdiz...
- Matç çox gərgin keçdi. Belə olacağını da bilirdik. Çünki rəqib keyfiyyətli futbolçulardan təşkil olunmuş komandadır. Çox güclü heyətləri var. Yaxşı oyun sərgiləyirlər. Onların göstərdikləri oyun digərlərinin oyunlarından fərqlənir. MOİK-i analiz edəndə rəqib haqqında oyunçularımıza çoxlu məlumat vermişdik.
- Qarşılaşmanın sonlarında vurduğunuz qolla qalib gəldiniz...
- Həqiqətən çətin olacağını başa düşürdük. Oyuna da ciddi hazırlaşmışdıq. İlk dəqiqələrdən hesabı açmaq istəyirdik. Qol epizodları da olmuşdu. Sadəcə, bəzən rəqib müdafiəçilər yaxşı oynadılar, bəzən isə futbolçularım ələ düşəb şansı qaçırdılar. Havanı da nəzərə almalıyıq. Çox isti idi. Bu, hər iki tərəfə çətinlik yaradırdı. Buna baxmayaraq meydanda əzmkarlıq göstərdik. İkinci hissədə yenə qol epizodları yaratdıq və bunlardan birində fərqlənı bildik. Qalib gəldiyimiz üçün çox şadıq. Bizim üçün önəmli üç xal idi. Futbolçularımı təbrik edirəm. Ürəklərini meydanda qoydular. Hər birinə minnətdaram. Həmişə yanımızda olan azarkeşlərə də təşəkkür edirəm. Hər oyunda qələbə qazanaraq onları sevindirmək istəyirik.
- "Mingəçevir" ardıcıl qələbələr əldə edir. Bu, motivasiyanızı daha da artırırmı?
- Əlbəttə. Belə olanda futbolçularda özünə inam da artır. Gənc heyətimiz var. Oyundan-oyuna təcrübə toplayırlar, daha yaxşı çıxış edirlər. Vaxt keçdikcə tələblərimizi daha yaxşı mənimsəyirlər. Gənc olduqları üçün oyundan-oyuna inkişaf edirlər. Dəyərləri artıq. Bu da bizə motivasiya verir.
- Bu nəticədən sonra "Mingəçevir" yuxarı pillələrə yaxınlaşır. İddianızı daha da artıra bilərsiniz?
- Bu il məqsədimiz komandamızın liqada qalması idi. "Mingəçevir" çox çətin durumda idi. 12 oyundan sonra cəmi 6 xalı var idi. Yeni heyət quruldu. Belə olanda hər hansı iş ortaya qoymaq üçün zaman lazımdır. Amma bizim vaxtımız yox idi. Həqiqətən çox çətin idi. Hazırda da hər şeyi çətinliklə edirik. Bu işdə bizə dəstək olan rəhbərliyə sağ ol deyirik. Futbolçulara təşəkkür edirik ki, çətin olsa da, əllərindən gələni etməyə çalışırlar. Hər matça qələbə üçün çıxırıq. Maksimun qalibiyyət əldə edib daha yuxarı pillələrdə olmaq istəyirik.
- Çətin olsa da, üçüncü yeri tutmağı düşünürsünüzmü? Üçüncü pillədəki "İmişli" ilə xal fərqi 11-ə düşüb.
- Bu il məqsədimiz liqada qalmaqdır. Maksimum çalışırıq ki, yuxarı pillələrə yüksələk. Rəqibin kimliyindən, səfərdə və ya evdə oynadığımızdan asılı olmayaraq hər matça qalibiyyət üçün çıxırıq. Komandanı qələbəyə motivasiya edirik.
- Bəs "Mingəçevir" Premyer Liqaya lisenziya üçün müraciət edəcəkmi?
- Bu haqda məlumatım yoxdur. Rəhbərlikdən asılı olan məsələlərdir. Bu barədə heç nə deyə bilməyəcəyəm.
