Idman.biz
"Atletik"in sürətli, yüksək tempi saxlamağı bacaran, ikinci və üçüncü zonada pressinq edən komanda olduğunu matçdan öncə də vurğulamışdım".
Bunu Fanat.Az-a açıqlamasında tanınmış futbol mütəxəssisi, "Neftçi"nin və 17 yaşadək Azərbaycan millisinin sabiq baş məşqçisi Füzuli Məmmədov deyib.
O, UEFA Çempionlar Liqasının Liqa mərhələsinin 3-cü turu çərçivəsində baş tutan "Atletik" - "Qarabağ" matçını (3:1) dəyərləndirib:
"İspaniya komandası oyuna 4-2-3-1 düzümü ilə başlamışdı. Komandamız ilk dəqiqədə yaxaladığı fürsətdən əla faydalanaraq hesabı açdı. Qoldan sonra gözlənildiyi kimi, dominant futbol sərgiləyən meydan sahibləri təmsilçimizi birinci zonaya sıxışdırdılar. Rəqib topu sağa-sola gəzdirir, hər iki "qanad"dan, xüsusilə Niko Uilyamsın yer aldığı sol cinahdan təhlükəli hücumlar qurur, ən kiçik boşluqdan ustalıqla faydalanırdı. "Atletik"in texnikalı futbolçuları çox dar ərazidə belə, topla əla rəftar edir, müdafiə xəttimizi təzyiq altında saxlayırdılar.
Onlar hesabı bərabərləşdirənə qədər də bir neçə real fürsət yaxalamışdılar. Əks-hücumlar qurmağımıza dərhal pressinq tətbiq edərək imkan vermirdilər. İkinci hissədə də eyni ssenari izlədik. La Liqa komandasının yüksək tempi saxlaması bəzi futbolçularımızın yorulması ilə nəticələndi ki, bu da təbii haldır. Onlar La Liqada çıxdıqları hər oyunda belə temp görürlərsə, "Qarabağ" yalnız Avropa səhnəsində bu cür matçlara çıxır. Təxminən 70-ci dəqiqədə "Atletik"in baş məşqçisi Ernesto Valverde düzümü dəyişərək 4-4-2-yə keçdi.
"Basklar"ın ifasında yenə kəsərli həmlələr, ara ötürmələri izlədik. Əzmkarlıqla müdafiə olunan komandamızı məğlubiyyətə görə qınamaq absurddur. Rəqib ikinci qolu vurandan sonra "Qarabağ" riskli oynamağa başladı. Hiss olunurdu ki, Azərbaycan təmsilçisi yenilgi ilə barışmaq niyyətində deyil. Təəssüf ki, müdafiədəki riskli oyunumuz üçüncü qolu buraxmağımızla nəticələndi. Futbolda həmişə qalib gəlmək anlayışı yoxdur. Bu yenilginin dünyanın sonu kimi qəbul etmək olmaz. "Qarabağ"a Çempionlar Liqasındakı növbəti oyunlarda uğurlar arzulayıram və inanıram ki, komandamız qarşıdakı matçlarda uğur qazana bilər".
