Sport24.az
"Karvan-Yevlax"ın çempionatda uğursuz çıxışı düşərgədə ab-havanı pozub. Sport24.az-ın əldə etdiyi məlumata görə, klub rəhbərliyi komandanın çıxışından narazıdır.
Etibarlı mənbədən redaksiyamıza ötürülən bilgiyə əsasən, rəsmilər baş məşqçi Azər Həşimovla yolları ayırmaq barədə düşünür. Bəzi təcrübəli oyunçuların da Həşimovla bağlı rəhbərliyə giley-güzar etməsi prosesi sürətləndirə bilər.
Mənbəmizin sözlərinə inansaq, Yevlax klubunun başbilənləri artıq yeni mütəxəssislə danışığa başlayıb. Müzakirələr zamanı ortaq məxrəcə gəlmək mümkün olsa, "ağ-qaralar"ın "sükanı" Füzuli Məmmədova tapşırılacaq.
Qeyd edək ki, Məmmədovun son iş yeri ötən yay ayrıldığı I Liqa klubu "Mingəçevir" olub. 2025-ci ilin qışında "nur şəhəri"nin təmsilçisinin baş məşqçisi təyin olunan Füzuli bəy "Mingəçevir"də uğurlu işi ilə yadda qalıb.
