Idman.biz
İspaniya polisi "Sevilya" klubunun müdafiəçisi Kike Salasın mərc oyunları ilə bağlı manipulyasiyalarda iştirakını sübut edib.
İdman.biz xəbər verir ki, bu barədə "El Confidencial" məlumat yayıb.
Futbolçunun mobil telefonundakı yazışmaları araşdırılıb və onun La Liqa matçlarında qəsdən sarı vərəqə aldığını göstərən sübutlar tapıb. Məlum olub ki, Salas hansı oyunda xəbərdarlıq alacağını dostlarına əvvəlcədən xəbər verirmiş. Ən azı beş belə hal rəsmi şəkildə sübuta yetirilib.
Pul qoyuluşu üçün futbolçunun dostlarının hesablarından istifadə olunub, qazancın 60 %-i Salasa, 40 %-i isə əlbir olduğu şəxslərə çatıb.
Salasla bağlı iş hələ yanvarda açılıb. 23 yaşlı futbolçunun 2023/2024 mövsümündə aldığı azı 10 sarı vərəqə araşdırma altındadır. İndi müdafiəçi 3 ilədək azadlıqdan məhrumetmə cəzası ilə üzləşə bilər.
Qeyd edək ki, bu mövsüm Salas La Liqada keçirdiyi 30 matçda 3 qol vurub, 2 məhsuldar ötürmə edib və 6 sarı vərəqə alıb.
İdman.biz
