Idman.biz
İş adamı Adnan Əhmədzadənin həbs olunmasından sonra İspaniyanın "Marset" klubunda olan azərbaycanlı uşaqlarla bağlı vəziyyət qeyri-müəyyən olaraq qalıb.
Həmin akademiyada çıxış edən uşaqlardan biri Kamil Həsənovun atası Mərdan Həsənov "Qafqazinfo"ya vəziyyətlə bağlı açıqlama verib.
O bildirib ki, ödənişlər olmadığı üçün "Marset" akademiyasından bildirilib ki, uşaqları orada saxlaya bilməyəcəklər:
"Mənim oğlum və onun bir qrup həmyaşıdları 2024-cü ilin sentyabr ayında həm futbol oynamaq, həm də təhsil almaq üçün İspaniyanın Barselona şəhərində yerləşən "Marset" akademiyasına yollanıb. Hər şey gözəl, hər şey əla idi, ta ki, məlum hadisəyə qədər. Son yaşananlardan sonra bizə dedilər ki, ödəniş olmadığı üçün uşaqları İspaniyada saxlaya bilməyəcəklər. ASTA (Azerbaijan Sport Talents Academy) rəhbərliyindən də hesablarının dondurulduğu üçün ödəniş etməklərinin mümkün olmadığını dedilər bizə.
Bildiyim qədərilə toplam 32 uşaqdan cəmi beş-altı nəfəri saxlayıblar. Həmin uşaqlar 2023-cü ildən "Marset"də olanlardır. Amma onları da deyəsən, yanvar ayına qədər saxlayacaqlar.
Kamil və onun bəzi komanda yoldaşları, yəni 2009-cu il təvəllüdlü uşaqlar bu hadisələr baş verəndə millinin heyətində idilər. Onlar milli ilə birlikdə Fransadan ölkəmizə gəliblər, İspaniyaya qayıtmayıblar.
Mən öz adımdan ASTA rəhbərliyinə təşəkkür etmək istəyirəm ki, uşaqlarımız üçün belə fürsət yaratmışdılar. Oradakı uşaqların 70-80 faizi milli üzvləri olduğu üçün AFFA-nın və Gənclər və İdman Nazirliyinin bu məsələyə müdaxilə etməsini gözləyirəm. Xahiş edirəm ki, uşaqlarımızın "Marset"ə qayıdıb futbolla məşğul olmasına köməklik etsinlər".
Qeyd edək ki, Bakının Səbail Rayon Məhkəməsi sentyabrın 20-də A.Əhmədzadə barəsində dörd aylıq həbs qətimkan tədbiri seçib. Adnan Əhmədzadə futbol dünyasına yaxın şəxs kimi də tanınır. O, "Barselona" klubunun rəhbərliyi, eləcə də Lionel Messi də daxil olmaqla bir neçə dünya futbol ulduzu ilə dostluq edir.
