Idman.biz
Futbol dünyasında zədələr adətən sərt toqquşmalar, ağır məşqlər və ya intensiv oyun zamanı baş verir.
Lakin elə hallar var ki, idmançılar tamamilə gözlənilməz və qeyri-adi situasiyalarda sıradan çıxırlar.
İdman.Biz bir sıra futbolçuların aldığı qəribə zədələri təqdim edir:
Con Stounz - Yeni il ağacının "qurbanı"
"Mançester Siti"nin müdafiəçisi Con Stounz Milad ağacını bəzəyərkən zədə alıb. Klub zədənin detalları barədə məlumat verməyib, Pep Qvardiola isə futbolçunun müddətsiz olaraq sıradan çıxdığını açıqlayıb. Şam ağacı bəzəmək futbolçuya baha başa gəlib.
Koul Palmer - video oyun həvəsinin nəticəsi
"Çelsi"nin ulduzu "EA Sports FC 26" kompüter oyununu oynayarkən qısa fasilə zamanı hövsələsi daralıb və əsəbiləşən futbolçunun barmağı stolun kandarına dəyərək sınıb.
Marko Sportyello – lüstrdən aldığı zədə
"Milan"ın qapıçısı oteldə köynəyini çıxararkən qolunu yuxarı qaldırıb və əli tavanın lampasına toxunub. Nəticədə oyunçu əlindən və çiynindən xəsarət alıb. Sportyello üç ay meydanlardan uzaq qalıb.
Santiyaqo Kanisares – "odekolon faciəsi"
İspaniya millisinin keçmiş qapıçısının aldığı zədə siyahıda bəlkə də ən qəribə hesab oluna bilər.
Belə ki, Santiyaqo Kanisares duşdan sonra odekolon vurmaq istəyərkən şüşəni əlindən salıb. Bu an o şuşəni ayağı ilə tutmağa çalışarkən flakon partlayaraq futbolçunun vətərini kəsib. Bu zədə səbəbindən Kanisares Dünya Çempionatını qaçırıb.
Göründüyü kimi, futbolda zədələr təkcə meydanda baş vermir. Bəzən ən adi məişət anı belə futbolçunun uzun müddət oyunlardan kənarda qalmasına səbəb ola bilir.
