Idman.biz
Azərbaycanın DÇ 2026-nın seçmə mərhələsində İslandiyaya 0:2 hesabı ilə məğlubiyyəti sosial şəbəkələrdə yenidən ciddi müzakirələrə səbəb olub.
İdman.Biz xəbər verir ki, istifadəçilər, o cümlədən idman ekspertləri və tanınmış simalar millinin oyununda irəliləyiş olduğunu qeyd etsələr də, uşaq futbolundakı problemlərdən tutmuş infrastruktur çatışmazlığına qədər müxtəlif mövzulara da toxunublar.
Müzakirələrə qoşulan tanınmış radio aparıcısı Tural Yusifov paylaşımında futbol meydançalarının ardıcıl şəkildə sıradan çıxarıldığını tənqid edib:
"Azərbaycanın futbol üzrə yığması 0:2 hesabı ilə İslandiya yığmasına məğlub olur. Səbəb? Məsələn: futbol meydançalarının yerində tikintilərin aparılması".
Yusifov Hövsanda yerləşən və uşaqlıq illərində oynadıqları futbol meydançasının taleyini xatırladaraq, "orada uşaq və yeniyetməlik dövrümüzdə futbol oynadığımız bir meydança var idi. Bəli, ot örtüyü, süni meydança deyildi, sadə torpaq örtüyü idi. Hamımız elə yerlərdə oynamışıq da. Bir çox uşaqlar belə yerlərdən böyük futbola keçid edib. Bu stadion Suraxanının keçmiş icra başçısı H.Abutalıbovun təşəbbüsü ilə salınmışdı", - deyə bildirib.
Onun sözlərinə görə, ənənəvi taktika ilə meydança əvvəlcə baxımsız buraxılıb, sonra isə məqsədli şəkildə yararsız vəziyyətə salınıb:
"Torpaq örtüyünün tikanla örtülməsinə göz yumdular. Stadionun yarısı tikanlığa çevrildi. Uşaqlar meydanın ikinci yarısında oynamasınlar deyə, o hissədə zibil qablarını sıra ilə düzdülər (peykdən çəkilmiş fotodan da görünür)".
Yusifov qeyd edir ki, stadion yalnız onun ətrafında qaçan və yaşlı insanların tonusda qalması, sürətli yürüş etməsi üçün yararlı qalıbmış. Və bir gün əvvəl ətrafını hasarlayıblar, bir ay içərisində isə stadion böyük bir tikili ilə əvəzlənib.
Yusifov nəticənin səbəblərinin çox daha dərin olduğunu vurğulayıb: "Deyirsiniz ki, niyə uduzuruq? Uşaqların futbol oynaması üçün nə həyətlərdə, nə də kənarlarda yer qalmayıb".
O, futbol meydançasına düzülən zibil qablarının mənzərəni simvolik şəkildə ifadə etdiyini də qeyd edib: "Bizim üçün futbolun yeri elə oradı".
Xatırladaq ki, İdman.Biz bir müddət əvvəl Kürdəxanı kəndində, şəxsi evinin həyətində uşaqlar üçün futbol meydançası quran 45 yaşlı Zakir Əliyevlə geniş müsahibə edib.
