Futbol hakimi matçın nəticəsinə təsir etməkdə şübhəli bilinərək saxlanılıb

Rusiyada futbol hakimi Birinci Liqa matçının nəticəsinə təsir göstərməkdə şübhəli bilinərək polis tərəfindən saxlanılıb.

İdman.biz xəbər verir ki, 33 yaşlı Boqdan Qolovkonun 2024/25-ci illər mövsümünün sonuncu turunda KAMAZ ilə oyunda "Torpedo"nun xeyrinə bilərəkdən səhv qərar verməsindən şübhələnirlər.

Oyun 1:1 hesabı ilə başa çatıb. Matçın 51-ci dəqiqəsində Qolovko KAMAZ-ın oyunçusu İlya Jiqulyovu meydandan qovub. Çempionatın yekunlarına əsasən, "Torpedo" birbaşa Rusiya Premyer Liqasına vəsiqə qazanıb.

Qolovko oyunun gedişində "Torpedo"nun qapısına iki mübahisəli epizodda penalti təyin etməyib. Rusiya Futbol İttifaqı prezidentinin nəzdində fəaliyyət göstərən Hakim-ekspert komissiyası bu epizodlardan birində hakimin qərarını düzgün, digərində isə səhv hesab edib.

Qolovkonun saxlanılması əməliyyatı Daxili İşlər Nazirliyinin əməkdaşları və Rusiya Futbol İttifaqının rəhbərliyinin dəstəyi ilə həyata keçirilib.

Bundan əvvəl Moskva məhkəməsi "Torpedo"nun sahibi Leonid Sobolev və klubun direktoru Valeri Skorodumovu komandanın oyunlarının nəticələrinə qanunsuz təsir göstərməkdə təqsirləndirərək istintaq təcridxanasına göndərmişdi. Paytaxt təmsilçisi cərimələnməkdən tutmuş bütün yarışlardan kənarlaşdırılmağa qədər müxtəlif cəzalarla üzləşə bilər.

Qeyd edək ki, Rusiya Futbol İttifaqının İntizam Komitəsi "Torpedo"nun işinə iyulun 10-da baxacaq.

İdman.biz