Fuad Bayramov: "Atamın bu sözləri mənə çox təsir etdi"

"Zirə"nin formasını geyinən Fuad Bayramov Sport24.az-ın əməkdaşının suallarını cavablandırıb. Müdafiəçi Premyer Liqanın ilk turunu dəyərləndirib, qarşıdakı avrokubok oyunu ilə bağlı fikirlərini bölüşüb.

- Öncə ilk turla bağlı fikirlərini bölüşərdin. "Səbail"i böyük hesabla məğlub edəcəyinizi gözləyirdin?
- Mövsümə qələbəylə başlamaq istəyirdik. Gərgin oyun alındı. Üç xalı heç də asan qazanmadıq. Şükürlər olsun ki, sonda istədiyimizə nail olduq.

- Bu gün meydanda ən fəallardan idin...
- Mövsümlərarası fasilədə yaxşı toplanış keçdik. Hər bir futbolçu, o cümlədən mən də üzərimdə maksimum çalışıram. Görünür onun bəhrəsidi.

- Avropa Liqasında "Şerif"lə penaltilər seriyasınsa qeyri-dəqiq zərbəylə yadda qaldın. Həmin an hansı hissləri keçirdin?
- Təbii ki, zərbəmi dəqiq tamamlamağı çox istətirdim, amma alınmadı və məyus oldum. Ancaq ruhdan düşməmişəm. Keçmişlə yaşamaq düzgün olmaz, irəli baxmaq lazımdı. Əsas odur ki, toparlandıq və Konfrans Liqasında Slovakiya təmsilçisinə qarşı yaxşı çıxış etməklə növbəti mərhələyə keçdik.

- Qarşıda sizi "Osiek"lə sınaq gözləyir. Xorvatiya təmsilçisiylə çətin olmayacaq?
- "Osiek" hazırlıqlı, yaxşı komandadı. Buna rəğmən bizdə meydanda sonadək mübarizə aparıb uğurun davamını gətirmək istəyirik. Səfərə nikbin yollanırıq. Məqsəd Bakıya qələbə ilə dönməkdi.

- Atan Etibar bəy, ənənəsinə sadiq qalaraq bu mövsümdə də səni tək qoymur. Hər oyununuzda onu tribunada görürük...
- Atama çox minnətdaram. O, uşaqlıqdan daim mənə mənəvi dəstək göstərib, bu gün da göstərməkdədir. Meydana çıxanda gözüm dərhal  atamı axtarır. Onun mənə dəstəyi əvəzsiz motivasiyadı.

- "Şerif"lə oyundan sonra qaçırdığın penaltiyə görə aranızda nə söhbət oldu?
- Matçdan sonra hamımız məyus idi. Atam zəng edib "heç kim penalti qaçırmaqdan sığortalanmayıb, bu sənin peşənin bir hissəsidi. Odur ki, bunda sonra daha da böyüməlisən" söylədi. Atamın bu sözləri mənə çox təsir etdi. Sanki üzərimdə ağır yük götürüldü. İstənilən halda atamın dəstəyini görürəm.

- Yeni "futbol ili"ndən gözləntin?
- Bizi ağır mövsüm gözləyir. Bu ildə məqsədimiz mükafatçılar sırasında yer almaqdı. Bunun üçün hər oyunda əlimizdən gələni edəcəyik.  


ABDULLA İSMAYILOĞLU