Idman.biz
Afrika futbolu üzrə ixtisaslaşmış Fransa nəşri olan "AfricaFootUnited" kamerunlu Vensan Abubakarın "Neftçi"yə transferi ilə bağlı məqalə dərc edib.
İdman.Biz-in məlumatına görə, məqalədə hücumçunun karyerasını davam etdirmək üçün gözlənilməz bir istiqamət seçdiyi və daha güclü liqalardan gələn təklifləri rədd etdiyi qeyd olunur.
Vurğulanır ki, 33 yaşlı Abubakar "Hatayspor"dan ayrıldıqdan sonra sabit oyun vaxtı qazanmaq və özünü yenidən təsdiqləmək üçün Bakıya köçmək qərarına gəlib. O, parlaq bir başlanğıc edib: "Neftçi"də iki matçda üç qol vurub və bir məhsuldar ötürmə edib.
Həmçinin qeyd olunur ki, belə bir addım müəyyən risklər daşıyır, əsasən də 2025-ci il Afrika Millətlər Kuboku öncəsi oyunçunun mediada təsirinin potensial azalması baxımından. Bununla belə, Azərbaycan klubunda müntəzəm oyun və liderlik rolu hücumçunun yüksək səviyyəsini qorumasına kömək edə bilər.
"AfricaFootUnited" karyerasının Azərbaycan mərhələsinin həm tramplin, həm də keçid dövrü ola biləcəyi qənaətindədir, lakin Abubakarın "Neftçi" ilə ilk oyunları ümidvericidir.
