Idman.biz
Fransa millisinin sabiq yarımmüdafiəçisi, hazırda isə "RMC Sport" kanalında ekspert kimi çıxış edən Jerom Roten Fransa Futbol Federasiyasını PSJ-nin hücumçusu Bredli Barkolanın zədəsi ilə bağlı tibbi məlumatları ictimaiyyətə açıqladığına görə sərt tənqid edib.
İdman.biz-in məlumatına görə, Roten federasiyanın bəyanatını məkrli bir gediş kimi dəyərləndirib və bu cür axmaqlıqların, deyəsən, heç vaxt bitməyəcəyini vurğulayıb.
O bildirib ki, Fransa Futbol Federasiyası tibb sirrini qorumalıdır və futbolçuların diaqnozunu açıqlamaqdan çəkinməyə borcludur: "Bu, çox məkrli bir işdir... Həkim sirri deyilən bir anlayış var, görünür, bunu unudublar. Bu axmaqlıqlar heç vaxt bitməyəcək".
Keçmiş futbolçu xatırladıb ki, adətən futbolçu yığmanın toplanışına gəlir, tibbi müayinədən keçir və əgər oynaya bilmirsə, zədənin xarakteri ilə bağlı heç bir ictimai şərh verilmədən kluba qayıdır.
Rotenin fikrincə, bu açıqlama federasiya ilə klublar arasında gərginliyi daha da artırıb. Bu gərginlik isə Usman Dembelenin və Dezire Duenin zədələri ilə bağlı əvvəlki hadisələrdən sonra daha da kəskinləşib.
Qeyd edək ki, Bredli Barkola oktyabrın 6-da Klerfontenə gəlib və burada yığmanın həkimləri onun "sağ dizaltı vətərdə xroniki zədə"si olduğunu müəyyənləşdiriblər. Elə həmin gün federasiya bu barədə rəsmi bəyanat yayıb ki, bu da PSJ-nin narazılığına səbəb olub. Paris klubu federasiyanın məlumatını açıq şəkildə təkzib edərək tibbi sənədlərdə xroniki zədəyə dair heç bir əlamətin olmadığını bildirib.
Bundan sonra Barkola yığmanın heyətində Floriyan Tovenlə əvəzlənib. Bu, Tovenin 2019-cu ildən bəri yığmaya aldığı ilk dəvətidir.
Xatırladaq ki, 2026-cı il dünya çempionatının seçmə mərhələsi çərçivəsində Fransa və Azərbaycan yığmaları arasında oyun oktyabrın 10-da Parisdə keçiriləcək. Matç Bakı vaxtı ilə saat 22:45-də başlayacaq.
Teymur Tuşiyev
