Idman.biz
AFFA Hakimlər Komitəsinin sədri Frank De Blekerin Misli Premyer Liqasının VI turu çərçivəsində keçirilən oyunlardakı mübahisəli epizodları şərh edib.
İdman.biz xəbər verir ki, mütəxəssis "İmişli" – "Zirə" və "Sabah" – "Sumqayıt" qarşılaşmalarında diqqət çəkən məqamlara toxunub.
Həmin oyunlarda qeydə alınan mübahisəli məqamları təqdim edirik:
"İmişli" – "Zirə"
36-cı dəqiqə
Top oyunda olarkən "Zirə"nin 4 nomrəli futbolçusu "İmişli"nin 9 nömrəli futbolçusunu arxadan ehtiyatsızlıqla itələdi. Hakimlər briqadası bu epizodu görmədi. VAR vəziyyəti yoxladı, lakin bu hərəkəti qırmızı vərəqə epizodu hesab etmədiyi üçün müdaxilə etmədi. (TV görüntülərində təmas nöqtəsi aydın görünmür)
Gözləntimiz "Zirə" futbolçusuna ehtiyatsız hərəkətə görə sarı vərəqə verilməsi, "İmişli"nin lehinə cərimə zərbəsi təyin olunması idi. Əgər təmas baş və ya üz nahiyəsində aydın görünərsə, onda zorakı davranışa görə qırmızı vərəqə gözlənilir.
"Sabah" – "Sumqayıt"
16-cı dəqiqə
Top "Sabah"ın 11 nömrəli futbolçusuna ötürüldü və o, topu qəbul etdikdən sonra "Sumqayıt"ın futbolçusuna (№80) qarşı ehtiyatsız şəkildə qaydanı pozdu. Hakim qayda pozuntusunu gördü, lakin üstünlük tətbiq etdi. Top oyundan çıxdıqdan sonra hakim "Sabah"ın futbolçusuna (№11) sarı vərəqə göstərdi.
Bu, düzgün qərardır, çünki "Sabah"ın futbolçusu topu almağa çalışarkən ayağının üst hissəsi ilə (tam təmas yoxdur) rəqibə toxundu. Ehtiyatsız oyuna görə sarı vərəqə doğrudur.
Əgər təmas ayaqdan yuxarı və ya güclü kontakt olsaydı, o zaman ciddi qayda pozuntusuna görə qırmızı vərəqə gözlənilərdi.
45+2-ci dəqiqə
Hücum zamanı "Sabah"ın futbolçusu (№21) cərimə meydançasında topu yaxın məsafədən "Sumqayıt"ın müdafiəçisinin qoluna vurdu. "Sumqayıt"ın futbolçusunun qolu bədəninə yaxın və təbii vəziyyətdə idi. Həmçinin, o, qolunu topa tərəf yönəltmədi. Hakim oyunu davam etdirdi və VAR da hakimin qərarını dəstəklədi. Bu, hakimin düzgün qərarı idi.
78-ci dəqiqə
Hücum zamanı "Sabah"ın hücumçusu (№20) qol vurur. VAR epizodu yoxlayır və hücumun başlanğıcında "Sabah"ın oyunçusunun (№5) topa oynadıqdan sonra ehtiyatsız şəkildə "Sumqayıt"ın oyunçusunun (№21) ayağına zərbə endirdiyini görür. VAR baş hakimi epizoda baxmağa dəvət edir.
Videogörüntülərə baxdıqdan sonra hakim hər iki kapitana vəziyyəti izah edir, qolu ləğv edir, "Sumqayıt"ın lehinə cərimə zərbəsi təyin edir və ehtiyatsız oyuna görə "Sabah"ın oyunçusuna (№5) sarı vərəqə göstərir. Bu, hakimin düzgün qərarı və VAR-ın düzgün müdaxiləsidir.
90+2-ci dəqiqə
"Sabah"ın hücumu zamanı hücumçu (№20) cərimə meydançasında topu qəbul edir və qol vurur. VAR epizodu yoxlayır və görür ki, "Sabah"ın hücumçusu qol vurmazdan əvvəl topa əli ilə toxunub.
Qaydalar bunu deyir: əgər oyunçu qol vurmazdan əvvəl əllə oyuna yol verirsə, qol ləğv olunmalıdır. Bu, hər zaman belədir – istər qəsdən, istərsə də təsadüfi olsun. VAR baş hakimi məlumatlandırır və o, qolu ləğv edir. Bu, hakimin düzgün qərarı və VAR-ın düzgün müdaxiləsidir.
