Idman.biz
Qolkiper Mark-Andre ter Ştegen Kataloniyada yenidən diqqət mərkəzindədir, amma bu dəfə Rudi Föllerin sayəsində.
İdman.biz xəbər verir ki, Almaniya millisinin keçmiş oyunçusu hesab edir ki, "Barselona"nın qolkiperi gələn il keçiriləcək dünya çempionatında millinin əsas qapıçısı olmalıdır.
Lakin Föllerin fikrincə, bu, onun hazırkı klubunda oynayıb-oynamamasından asılıdır.
"Ter Ştegen kimi qapıçı dünya çempionatında oynamağa layiqdir. Baumann son aylarda əvəzedici kimi çox yaxşı çıxış etdi, lakin Ter Stegen əsas qapıçı olmalıdır. Ümid edirəm ki, o, tezliklə qayıdacaq. Yanvardan başlayaraq "Barselona"ya və ya başqa kluba. Bu, indi çox vacibdir. O, milli komandaya qayıtmaq üçün oynamalıdır", - deyə Föller bildirib.
Xatırladaq ki, alman qapıçı belində zədədən sonra əməliyyat olunub və hazırda sağalma mərhələsindədir. Onun yanvarda "Barselona"nın heyətinə qayıdacağı gözlənilir. Lakin Joan Qarsia ilə müqavilə bağlamış klubda əsas heyətə düşə bilmək perspektivi aydın deyil.
Ter Ştegenlə "Barselona" arasında mövsümün əvvəlindən fikir ayrılığı var idi. Klub qapıçını kapitanlıqdan məhrum edərək haqqında intizam icraatına başlanmışdı. Bununla belə, çəkişmə qapıçının tibbi hesabatını La Liqaya təqdim etməyə icazə verməsi ilə başa çatdı. Bu, kluba başqa qapıçı ilə müqavilə imzalamağa imkan verdi.
