Idman.biz
"Barselona"nın baş məşqçisi Hansi Flik Lamin Yamal, Rafinya və Pedri ilə bağlı son durumu dəyərləndirilib. Flik həmçinin Lionel Messinin mümkün qayıdışı barədə səslənən suallara da münasibət bildirib.
İdman.Biz xəbər verir ki, komandanın sabahkı oyuna hazırlığında Yamalın durumunun yaxşı olması, Rafinyanın meydana qayıtması və Pedrinin bərpa prosesinin mərhələli şəkildə davam etməsi klub daxilində əsas diqqət mövzuları kimi göstərilib.
Yamalla bağlı danışan Flik bildirib ki, hücumçu sabaha hazır olacaq.
"O, çox yaxşı çalışır və bundan məmnunam. Son iki həftə oyunlardan dincəlməsi ona yaxşı təsir etdi. Rafinya da geri dönüb. Amma ehtiyatdan başlayacaq və neçə dəqiqə oynaya biləcəyini görəcəyik", - deyə baş məşqçi bildirib.
Pedri ilə bağlı isə ehtiyatlı danışan Flik onun bərpasının davam etdiyini söyləyib.
Lionel Messinin "Barselona"ya mümkün dönüşü haqqında verilən sualı isə Flik belə cavablandırıb:
"Messi son on ilin ən yaxşı futbolçusudur. Onu izləmək həmişə zövq verib. Amma onun müqaviləsi 2028-də bitir, mənim müqaviləm isə 2027-də. Yəni bu mövzu barədə danışmaq mənlik deyil".
