Idman.biz
"Abubakarın gəlişi çox yaxşıdır. Hər halda, klub əla futbolçu transfer edib".
Bunu "Neftçi"nin sabiq kapitanı Flavinyo apasport.az-a müsahibəsində bildirib.
Həmin müsahibəni təqdim edirik:
- "Neftçi" 8 turdan sonra cəmi 9 xalla 9-cu pillədə qərarlaşıb. Bakı təmsilçisinin bu cür çıxışını necə dəyərləndirirsən?
- Təbii ki, başqa sözlər demək istərdim. Amma təəssüf ki, "Neftçi" üçün yenə uğursuz il başlayıb. Əlbəttə, fərqli olmasını arzulayırdım. Ancaq mövsümə yaxşı start verilməyib. Ümid edək ki, bundan sonra vəziyyət düzələcək.
- Səncə, "Neftçi"də hazırda çatışmayan əsas məqam nədir? Niyə komanda qalib gələ bilmir? Klub çempionatda cəmi bir qələbə qazanıb…
- Dediyim kimi, gözləntilər fərqli idi, amma hazırda başqa nəticələr görürük. Bilmirəm, komandada və ya klubda nə baş verir ki, bu cür nəticələr yaranır. Ümid etməkdən başqa yol yoxdur.
- "Neftçi" Kamerun millisinin hücumçusu Vensan Abubakarı transfer edib. Bu keçidi necə qarşıladın?
- Abubakarın gəlişi çox yaxşıdır. Hər halda, klub əla futbolçu transfer edib. Düşünürəm ki, onun gətirilməsi çox düzgün addımdır. Bu, komandaya böyük mənəvi ruh verəcək. Çempionlar Liqasında titullar qazanan və orada oynamış futbolçunun komandaya xeyir verməsi gözləniləndir. Yaxşı oyunçu qrupu və peşəkar məşqçi heyətindən çox şey asılıdır.
- Vensan Abubakar sonuncu dəfə altı ay əvvəl "Hatayspor"da oynayıb. Klubsuz idi, amma millidə çıxış edirdi. Səncə, Abubakar "Neftçi"də uğurlu olacaq?
- Abubakarı tanıyıram, təbii ki, hamımız onu izləmişik. Dediyim kimi, yaxşı futbolçudur, Kamerun millisində də oynayır. Ümid edirəm ki, "Neftçi"yə xeyir verəcək.
- Vaxtilə Emil Mpenza da "Neftçi"də oynamışdı. Ondan gözləntilər yüksək idi. Səncə, o, lazımi qədər xeyir verə bildimi? Mpenza ilə Abubakarı müqayisə etmək olarmı?
- Mpenza haqda hamı bilir, o, çox yaxşı klublarda oynamışdı. Amma Mpenzanın yer aldığı "Neftçi" də yaxşı komanda idi. Klub da ona kömək etdi. Qarşılıqlı anlayış və yardımlaşma sayəsində biz çempionluq yaşadıq.
- Səncə, "Neftçi"yə yeni Flavinyo lazımdır? Ola bilərmi ki, komandada yeni Flavinyo çatışmır?
- "Neftçi" ilə danışmışdıq ki, geri qayıdıb komandaya kömək edim. Amma təəssüf ki, sonda bu danışıqlar dayandı… "Neftçi"nin klubu inkişaf etdirəcək bir çox strategiyaları var. Hər şeyin yaxşı olacağına ümid edirəm.
