Firuz Abdulla "Səbail"dəki dəyişikliklər, hədəflər və heyət məsələləri barədə danışıb

"Baş məşqçi dəyişikliyi ilə bağlı bir oyunun nəticəsinə əsaslanıb qərar qəbul etmək düzgün olmaz. Mənim yanaşmam belədir". Bu sözləri Sport24.az-a "Səbail"in icraçı direktoru Firuz Abdulla deyib.

Fuksioner baş məşqçi Elvin Məmmədovla yolların ayrılması ilə bağlı danışıb:

"Mövsüm ərzindəki nəticələrin bizi qane etmədiyini də deyə bilmərəm. Hər şey o qədər də bərbad vəziyyətdə deyildi. Amma bəzən elə məqamlar yaranır ki, hiss edirsən hansısa dəyişikliyə ehtiyac var. Ona görə də qarşılıqlı razılıq əsasında yollarımızın ayrılması ilə bağlı qərar qəbul etdik".

O, yeni baş məşqçi Adil Şükürovun təyinatı ilə bağlı da fikirlərini bölüşüb:

"Hədəfimiz dəyişmir. Məqsədimiz mövsümü birinci pillədə başa vurub yenidən Premyer Liqaya vəsiqə qazanmaqdır. Adil Şükürovdan gözləntilərimiz hədəfimizə çatmaq baxımından komandaya kömək etməsini gözləyirik.

Dünən ilk məşqini keçirib. Bu gün ikinci məşqidir. İstənilən komanda həm mövsümlərarası, həm də dövrələrarası fasilədə heyətini gücləndirməklə bağlı düşünür. Bu istək və həvəslə bağlı olan məsələ deyil. Büdcə də buna imkan verməlidir. Mövzu ilə bağlı müzakirə olmayıb. Qarşıdakı oyunlardan sonra bu məsələ ilə bağlı danışa bilərik. İlkin yanaşma belədir ki, hazırkı heyət bu mövsümü uğurla başa vurmaq üçün kifayət edir".

Qeyd edək ki, 9 turdan sonra aktivində 18 xal olan "Səbail" lider "Şəfa"dan 5 xal geri qalmaqla turnir cədvəlində ikinci pillədə qərarlaşıb.