Report.az
Filip Ozobiç "Neftçi"nin heyətində Azərbaycan çempionatlarında 15-ci qolunu vurub.
"Report" Peşəkar Futbol Liqasının mətbuat xidmətinə istinadən xəbər verir ki, Xorvatiya əsilli yarımmüdafiəçinin yubileyi Misli Premyer Liqasının XXX turuna təsadüf edib.
O, "Zirə" ilə ev oyununda (2:4) hesabı açıb.
Ozobiç karyerasında 3-cü klubla Premyer Liqada 15 və daha çox qol vurub. O, "Qəbələ"də 16, "Qarabağ"da 35 dəfə fərqlənib.
Filip ölkə çempionatları tarixində 3 fərqli klubda məhsuldarlıq göstərən 6-cı, ən azı 3 komandada bunu bacaran 7-ci futbolçu olub. Onadək Qurban Qurbanov ("Daşqın", "Turan", "Neftçi"), Samir Əliyev (MOİK, "Neftçi", "Xəzər Lənkəran"), Rövşən Əhmədov ("Turan", "Kəpəz", "Şəmkir"), Kənan Kərimov ("Qarabağ", "Şəmkir", "Turan"), Fərrux İsmayılov ("Bakı", "Neftçi", "Karvan") üç komandada 15 və daha çox qola imza atıb.
Mütləq rekord isə Nazim Əliyevə məxsusdur. O, 4 klubla – "Xəzər" (Sumqayıt), "Neftçi", "Qarabağ" və "Bakı"da (əvvəlki "Dinamo") belə məhsuldarlıq göstərib.
