Idman.biz
"Biz qələbə qazanmağı hədəfləyirdik. Hesabda geri düşdükdən sonra daha böyük qüvvə ilə irəli atıldıq".
Bunu "Turan Tovuz"un yarımmüdafiəçisi Filip Ozobiç futbolxeber.az-a müsahibəsində bildirib.
Həmin müsahibəni təqdim edirik:
- Azərbaycan Premyer Liqasının IX turunda "Karvan-Yevlax"ı çətinliklə məğlub etdiniz. 2:1 hesablı qələbəni necə şərh edərdiniz?
- Bilirdik ki, çətin oyun olacaq. "Karvan-Yevlax" yaxşı futbol sərgilədi. Buna baxmayaraq, qalib gələ bildik. Qazonun süni olması bir qədər işimiz çətinləşdirmişdi. Bütün çətinliklərə baxmayaraq, yekunda istəyimizə çatdıq və vacib 3 xal qazandıq.
- Autsayderlə görüşdə asan qələbə qazanacağınız gözlənilsə də, çox çətinlik çəkdiniz. Buna səbəb nə oldu?
- Biz asan qələbə gözləmirdik. Turnir cədvəlindəki mövqeyinə, neçə xal toplamağına baxmayaraq, "Karvan-Yevlax" yaxşı komandadır. Bunu da sübut etdilər. Ümumiyyətlə, heç bir matçda asan qələbə qazanmaq olmur. Bütün komandalar sona qədər mübarizə aparırlar.
- Komandanız sanki qapısından qol buraxdıqdan sonra ayıldı...
- Biz qələbə qazanmağı hədəfləyirdik. Hesabda geri düşdükdən sonra daha böyük qüvvə ilə irəli atıldıq. Yaxşı ki, hesabı tez bərabərləşdirdik. Daha sonra isə ikinci qolu vurmağa müvəffəq olduq.
- Yenidən liderliyə yüksəldiniz. Bu dəfə liderliyi saxlamaq nə dərəcədə uzunmüddətli olacaq?
- Bəli, hazırda liderik. Lakin turnir cədvəlinə baxmaq lazım deyil. Yalnız növbəti matçı düşünməliyik. Hər oyun bizim üçün vacibdir. Ona görə də növbəti görüşlərə ciddi şəkildə hazırlaşmalıyıq.
- Gələn həftə həm kubok, həm də çempionatda oyununuz var. Sıx qrafikə hazırsınız?
- Bəli, əvvəlcə kubokda meydana çıxacağıq. Rəqib ikinci liqa təmsilçisi "Dinamo" olsa da, matça ciddi yanaşmalıyıq. Heç bir rəqibə zəif gözü ilə baxmaq olmaz. Daha sonra isə çempionatda "Şamaxı" ilə üz-üzə gələcəyik.
- Növbəti oyunu Tovuzda – doğma stadionda keçirəcəksiz. Bu, işinizi daha da asanlaşdıracaq?
- Bu, çox xoş olacaq. Doğma azarkeşlərimiz önündə çıxış edəcəyik. Onların dəstəyi ilə yaxşı nəticə qazanmağı hədəfləyirik.
- Sabiq klubunuz "Qarabağ"ın Çempionlar Liqasındakı çıxışını necə qiymətləndirirsiniz?
- "Qarabağ" ÇL-də çox yaxşı nəticələr qazanır. Bu, həm klub üçün, həm də Azərbaycan futbolu üçün müsbət haldır. 3 oyundan 6 xal toplayıblar və bu, çox yaxşı nəticədir.
