Sport24.az
FİFA prezidenti Canni İnfantino mövsümdə matçların çox olmasından şikayətlənən futbolçulara cavab verib. Sport24.az xəbər verir ki, ali futbol qurumunun rəhbəri həmçinin qarşıdan gələn Klublararası Dünya Çempionatı ilə bağlı fikirlərini bildirib:
"Düşünürəm ki, Klublararası Dünya Çempionatı fantastik yarışdır. Turnirə dünyanın hər yerindən komandalar qatılacaq.
Yarış bir ay davam edəcək və Konfederasiyalar Kubokunu əvəz edəcək. Bu daha məntiqlidir. Unutmayın ki, FIFA dünya üzrə oyunların 1%-dən azının təşkilinə cavabdehdir.
Narazılıq varsa, oyunların 99%-ni təşkil edənlərdən başlamaq daha düzgün olardı. FİFA-nın bu 1%-i dünya futboluna çox fayda verir. Biz həmçinin Dünya çempionu olmaq şansı olmayan ölkələrin oyunçularına imkan yaradırıq.
Bu yaxınlarda "Mançester Siti"də oynayan Haaland və Akanji ilə danışdım. Onlar əla futbolçudurlar və indi onların milli komandaları ilə deyil, klubları ilə dünya kubokunu qazanmaq şansları var".
Qeyd edək ki, bu il Klublararası dünya çempionatı ilk dəfə olaraq geniş formatda keçiriləcək. Yarışda altı konfederasiyadan 32 komanda iştirak edəcək. Turnir iyunun 15-dən iyulun 13-dək ABŞ-da baş tutacaq.
