Fidan Cəfərova: "Bəzən uğur qazanmaq üçün bəxt də insanın tərəfində olmalıdır"

"Litva millisi doğma meydanda oynayırdı ki, bu da onlar üçün üstünlük idi. Buna baxmayaraq matça yaxşı hazırlaşaraq, istədiyimiz nəticəni əldə edə bildik". Bu sözləri Sport24.az-a açıqlamasında qadınlardan ibarət Azərbaycan millisinin futbolçusu Fidan Cəfərova deyib.

Yığmamızın üzvü UEFA Millətlər Liqasının qrup mərhələsi çərçivəsində Monteneqro ilə oyun (1:1) haqqında da fikirlərini bölüşüb:

"Monteneqro ilə oyun barədə onu deyə bilərəm ki, onlar əvvəlki turda istirahət etdiklərindən funksional cəhətdən bizdən üstün idilər. Doğma meydan amili də rəqibin işinə yarayırdı. Bütün bunlara baxmayaraq, özümüzə inanırdıq".

Cəfərova komandanın Monteneqro ilə görüşə müəyyən itkilərlə çıxdığını vurğulayıb:

"Bildiyiniz kimi, əsas heyətin bəzi üzvləri müxtəlif səbəblərdən yox idi ki, bu da işimizi çətinləşdirirdi. Məqsədimiz qələbə qazanıb qrup liderliyini təmin etmək idi. Oyun üstünlüyü bizdə idi, hesabı açan tərəf də biz olduq. Təəssüf ki, qələbə hesabını qoruya bilmədik, rəqib penalti ilə tarazlığı bərpa etdi. Bəzən qalib gəlmək üçün şans da səninlə olmalıdır. Amma ruhdan düşmürük. Sonuncu oyunumuzu Litva ilə Bakıda oynayacağıq. Komanda olaraq bu oyunda daha yaxşı nəticə qazanacağımıza, aradakı 1 top fərqini xeyrimizə çevirəcəyimizə inanırıq. Azarkeşlərimizi bizi dəstək olmağa çağırırıq. Onların çox olmağı bizim üçün əlavə motivasiyadır".

Qeyd edək ki, C liqası 4-cü qrupunun son səfər görüşündə Monteneqro ilə qarşılaşan millimiz qələbəni son anda əldə verib. 54-cü dəqiqədə Manə Mollayeva hesabı açıb. Meydan sahibləri 90+2-ci dəqiqədə penaltidən bərabərlik qolunu vurublar. Millimiz son oyununu mayın 30-da evdə Litvaya qarşı keçirəcək.