Idman.biz
Türkiyə Futbol Federasiyasının (TFF) sabiq vitse-prezidenti Lütfi Arıboğan və daha üç nəfər futbol sahəsində aparılan FETÖ istintaqı çərçivəsində saxlanılıb.
İdman.Biz Türkiyə mediasına istinadla xəbər verir ki, məlumatına görə, Arıboğanın istintaq çərçivəsində ifadəsi alınacaq. Onunla yanaşı Ahmet Gülüm, İlhan Helvacı və Ebru Köksal da ifadəyə çağırılan şəxslər arasındadır.
Qeyd olunur ki, Lütfi Arıboğan 2008-ci ildə Türkiyə Futbol Federasiyasında vitse-prezident vəzifəsinə təyin edilmişdi.
Baş Prokurorluğun yaydığı rəsmi açıqlamada bildirilir ki, ictimaiyyətdə "2011-ci ildə futbolda fırıldaqçılıq istintaqı" kimi tanınan və bir çox idman ictimaiyyəti nümayəndəsini hədəf alan proseslərlə bağlı araşdırma aparılır.
Açıqlamada qeyd olunur ki, həmin dövrdə aparılmış bəzi istintaq və məhkəmə proseslərinin FETÖ terror təşkilatına mənsub bir qrup keçmiş dövlət məmuru tərəfindən qanunsuz şəkildə yönləndirildiyi ehtimal olunur.
Bu çərçivədə adı çəkilən şəxslərin həmin şəxslərlə əlaqədə olaraq qanunsuz əməliyyatlarda iştirak etdikləri şübhəsi ilə "terror təşkilatına yardım etmək" və "istintaqın məxfiliyini pozmaq" maddələri üzrə ifadələrinin alınması üçün İstanbul Polis İdarəsinə göstəriş verilib.
