Sport24.az
"İmişli" ilə əməkdaşlığı yekunlaşdırdıq. Başqa klublardan şifahi təklif oldu. Ancaq birindən gələn təklif daha ciddi idi. Rəhbərliklə görüşüb söhbət etdik, amma razılaşa bilmədik. Ona görə də hazırda gözləmə mövqeyindəyəm". Bu sözləri Sport24.az-a açıqlamasında "İmişli"nin sabiq baş məşqçisi Fərid Namazov deyib.
PRO kateqoriyası almaq istəyən mütəxəssis Slovakiya səfərindən də söhbət açıb:
"PRO lisenziyası ilə bağlı Slovakiyaya səfərimiz maraqlı keçdi. 21 yaşadək futbolçular arasında təşkil olunan Avropa çempionatının final mərhələsini izlədik. Fərqli-fərqli şəhərlərdə olduq. Oyunlar 4 qrupda keçirilirdi. Hər məşqçi üç oyuna baxdı və onun təhlilini apardı. Qrup şəklində bölüşüb təlimatçılarla birlikdə oyunlara gedirdik. Ancaq qrup mərhələsində orada olduq. Sonra isə işimizi yekunlaşdırdıq. Bu, sadəcə PRO lisenziyasının bir modulu idi. Digərləri isə növbəti aylarda baş tutacaq".
Qeyd edək ki, Namazov karyerası ərzində "Səbail", "Qarabağ" kimi klublarda məşqçi kimi çalışıb, son olaraq isə Azərbaycan U-19 komandasında məşqçi kimi və eyni zamanda AFFA və UEFA-nın lisenziya kurslarında təlimatçı kimi çalışıb.
