Idman.biz
"Qarabağ"ın sabiq qapıçısı Fərhad Vəliyevin futbolinfo.az saytına müsahibə verib.
- "Qarabağ" Çempionlar Liqasının Liqa mərhələsində ilk oyununu bu gün səfərdə "Benfika"ya qarşı keçirəcək. Hansı nəticəni gözləyirsiniz? "Qarabağ"ın Portuqaliyadan uğurlu nəticə ilə qayıtmaq şansı varmı?
- Çox çətin oyun olacaq. Çünki tarixə nəzər salsaq, "Benfika" Çempionlar Liqasında ən çox iştirak edən klublardan biridir. Bu səbəbdən "Qarabağ"ı ağır səfər matçı gözləyir. Təbii ki, futbolda hər şey ola bilər. Amma "Benfika" həqiqətən də güclü rəqibdir. "Qarabağ" Portuqaliyada uğurlu nəticə əldə etsə, bu, böyük nailiyyət olar.
- Bilirik ki, Portuqaliya klubları da topla oynamağı sevirlər, üstəlik, rəqibin heyətində ustalıq səviyyəsi yüksək olan futbolçular toplaşıb. Bu məqamlar "Qarabağ"a öz oyununu göstərmək baxımından mane ola bilərmi?
- Əlbəttə, Portuqaliyanın digər klubları kimi, "Benfika" da həmişə öz texnikası, yaxşı futbolu ilə seçilib, öndə olub. Ancaq "Qarabağ" da topla oynamağı sevir. Düşünürəm ki, "Benfika" böyük qüvvə ilə hücumlar etsə belə, "Qarabağ"da da topla yaxşı davranan, texnikalı oyunçular var. Bu baxımdan təmsilçimiz "Benfika"dan geri qalmayacaq, öz oyununu göstərməyə və nəticə əldə etməyə çalışacaq.
- Yeni hücumçu transferi alınmadı, üstəlik, Nəriman Axundzadə də zədəlidir. Bunların fonunda "Qarabağ"da hücumun sivri ucunda kimin yer alacağını düşünürsünüz? Bir də bu gün çempionumuzun heyətində kimdən qol gözləyirsiniz?
- Bəli, Nəriman zədəlidir, yeni hücumçu transfer etmək mümkün olmadı. Bu, komandaya əlavə çətinlik yarada bilər. Görünür, "Qarabağ"a tam uyğun futbolçu tapa bilməyiblər və ya danışıq aparılan oyunçularla anlaşma mümkün olmayıb. Bilirsiniz ki, Azərbaycana yaxşı futbolçu gətirmək çətindir. Bəlkə də, qarşıdakı aylarda keyfiyyətli hücumçu transfer edə biləcəklər, yəqin ki, axtarışdadırlar. Nəriman zədəli olsa da, Musa Qurbanlı var. O da son vaxtlar öz oyunu ilə göstərir ki, əsas heyətdə yer ala bilər. Bundan əlavə, "Qarabağ"ın hücumameylli oyunçuları çoxdur. Düşünürəm ki, Qurban müəllim buna bir əlac tapa biləcək. Çətin olsa da, səfərdə "Qarabağ"dan qollar gözləyirik.
- Liqa mərhələsindəki rəqiblərin səviyyəsi hər kəsə bəllidir. Sizcə, "Qarabağ" bu mərhələdə neçə xal toplamaq iqtidarındadır?
- "Qarabağ"ın Liqa mərhələsindəki rəqiblərinin hamısı güclü klublardır. Göz gəzdirəndə görürük ki, Çempionlar Liqasında zəif komanda yoxdur. Bu isə o deməkdir ki, 8 oyunun hər biri "Qarabağ" üçün çətin keçəcək. Xüsusən, səfər görüşləri ağır alınacaq. Bu mənada, səfər matçlarında az xal toplayacaqlarını düşünürəm. Amma Bakıda "Qarabağ" rəqiblərdən xal qopara, qələbə qazana da bilər.
İdman.biz
