Idman.biz
"Zirə"nin qapıçıların hazırlığı üzrə məşqçisi Fərhad Vəliyevin futbolinfo.az saytına müsahibəsi
– Ölkə çempionatının 2024/2025 mövsümünü də gümüş medalla tamamladınız və yenidən avrokuboklarda çıxış edəcəksiniz. "Zirə"nin gözləntiləri tam doğrultduğunu düşünürsünüz, yoxsa komandanızın potensialı bundan da artığına imkan verirdi?
– Düşünürəm ki, mövsümü çox yaxşı keçirdik. İlk yarının sonlarında ikinci yerdən 13 xal geridə idik. Bu qədər xal fərqini aradan qaldıraraq ikinci yerə yiyələndik. Ümumilikdə, mövsüm bizim üçün çox uğurlu alındı. Gümüş medalları əldə etdik və avrokuboklara vəsiqə qazandıq.
– Keçən mövsüm də gümüş medal qazanmışdınız, ancaq həmin vaxt "Zirə"nin göstərdiyi oyunu bəyənməyənlər az deyildi. Bu mövsüm isə komanda nəticə ilə yanaşı, sərgilədiyi oyunla da rəğbət qazandı. Bu, ötən yay etdiyiniz düzgün transferlərin hesabına oldu, ya başqa məqamlar buna gətirib çıxartdı?
– Bu il də çempionat asan keçmədi. Elə oyunlar var idi ki, gərginliyi yüksək səviyyədə idi. Amma keçən mövsüm bu mövsümdən daha gərgin keçmişdi. Ötən sezon oyunların gərginliyi daha yüksək idi. Son tura kimi 2, 3 və 4-cü yerlərin sahibi bəlli deyildi. Yalnız son turda kimin neçənci yeri tutduğu məlum oldu. Ötən mövsüm qısa bir dövr yaşadıq ki, həmin vaxt təxminən 9-10 oyunda qələbə qazana bilmədik. Amma əsas sonluqdur. Mövsümün sonunda gərginlik artır, hər bir komanda avrokuboklara düşməyə can atır. Keçən sezon qış fasiləsindən sonra etdiyimiz transferlər, göstərdiyimiz oyun yekunda gümüş medalları qazanmağımızla nəticələnmişdi. Bu mövsümkü çıxışa gəlincə, əlbəttə, bunda komandaya cəlb olunan yeni transferlərin də əməyi oldu. Addım-addım irəli getməyə çalışırıq. İnşallah, gələcəkdə də yaxşı oyunlar göstərərək azarkeşlərimizi sevindirəcəyik.
– "Zirə" keçən yay avrokuboklarda uğurlu çıxış etmişdi. Bu il də Azərbaycanı layiqincə təmsil edə biləcəksiniz?
– Bildiyiniz kimi, keçən il mübarizəyə Avropa Liqasının təsnifat mərhələsindən başlamış, Konfrans Liqasının pley-offuna qədər irəliləmişdik. Qrup mərhələsinin bir addımlığında məğlub olmuşduq. Həqiqətən də, ötən il pis nəticə əldə etmədik. Bu il də maksimum nəticəyə nail olmaq üçün əlimizdən gələni edəcəyik. Ən azından, keçənilki kimi pley-offa qədər adlamağa çalışacağıq. Əlbəttə, rəqiblərdən də çox şey asılıdır. İnanıram ki, mərhələlər adlayaraq güclü futbol ölkələrinin təmsilçilərini də təəccübləndirəcəyik. İlk növbədə, yaxşı oyun nümayiş etdirməyə və təbii ki, nəticə verərək azarkeşlərimizi sevindirməyə çalışacağıq.
– Çempionatda "Qarabağ"dan sonra ən az qol buraxan komanda oldunuz. Qapıçı məşqçisi olaraq, siz "Zirə"nin qapıçılarının cari mövsümdəki çıxışından tam razı qaldınız?
– Keçən sezon ən az qol buraxan komanda "Zirə" olmuşdu. Bu mövsüm isə "Qarabağ"dan sonra ən az qol buraxan ikinci komanda olduq. Keçən mövsümdə də, bu sezonda da qapıçılarımız qənaətbəxş çıxış etdilər. Ümumilikdə, onlardan razı qaldıq. Amma düşünürəm ki, ötən sezona baxanda bu mövsüm qapıçılarımız daha yaxşı oyunlar çıxara və daha az qol buraxa bilərdilər. Ancaq yenə deyirəm, ümumi götürdükdə performanslarından razı qaldıq.
– Azərbaycan çempionatında çıxış edən qapıçılar arasında ən çox kimləri bəyənirsiniz? Və yerli qolkiperlərdən hazırda "1 nömrə" kimdir?
– Bir neçə komanda var ki, qapıçıları pis çıxış etmədilər. Məsələn, "Şamaxı"nın qolkiperi Rikardo Fernandesin qurtarışları çox oldu. O, çempionatımızda fərqləndi. "Sabah"ın mövsümün gedişində transfer etdiyi Stas Pokatilov komandaya uyğunlaşandan sonra pis oyun nümayiş etdirmədi. Yerliləra gəlincə, "Neftçi"nin qapıçısı Rza Cəfərovu fərqləndirərdim. Düzdür, "Neftçi" bu mövsüm iddialarından uzaq qaldı. Amma Rza stabil oyun nümayiş etdirdi, komandasına köməyi dəydi. Şahrudin Məhəmmədəliyev bu mövsüm zədəsi üzündən bir müddət "Qarabağ"dan uzaq qaldı. Amma o da yaxşı qapıçıdır. Artıq zədədən qayıdıb. Düşünürəm ki, millinin qarşıdakı oyunlarında şans qazanacaq. Bir də öz qapıçımız Aydın Bayramovu vurğulamaq istəyirəm. Aydından bu il tələblərim çox olsa da, ümumilikdə stabil oyunlar keçirdi. Əslində, Aydın bundan artığını edə bilər, həmin potensiala malikdir. Onun öz oyunlarını gözünün qabağına gətirərək, artıracağına, daha da irəliyə gedəcəyinə inanıram.
İdman.biz
