Sport24.az
"Araz-Naxçıvan"ın futbolçusu Felipe Santos Sport24.az-a müsahibə verib. Braziliyalı legioner komandasının son oyununu dəyərləndirməklə yanaşı, bizi maraqlandıran başqa sualları da cavablandırıb
- Ardıcıl iki oyundu qələbə qazanırsız. Komandanın artıq relsə düşdüyünü söyləmək olar?
- Qələbələr sıralamaq xoşdu. Amma bu bizə heç də asan başa gəlmir. Elə "Kəpəz"lə oyun da bizim üçün çətin keçdi. İlk yarıda yaxşı çıxış edə bilmədik. Amma fasilədən sonra toparlanaraq lazım olan qolu vurub qələbə qazandıq.
- Demək olar hər oyunda yetərincə qol epizodları yaratsaz da, son nöqtəni qoymaqda çətinlik çəkirsiz. Bu nə ilə bağlıdır?
- Bəli, qol imkanlarımız boldu, amma qollarımız azdı. Məşqlərdə bunun üzərində çalışırıq. Amma bəxtimiz gətirmir. Görünür rəqiblər də bizi yaxşı analiz edir. İstənilən halda çatışmazlığı aradan qaldırmalıyıq. Qarşıdakı oyunlarda daha çox qol vuracağımıza inanıram.
- Xeyli müddətdi Azərbaycandasan. "Keşlə" (hazırkı "Şamaxı"), "Qəbələ"də oynamısan, hazırda isə "Araz-Naxçıvan"ın şərəfini qoruyursan. Hansı klub karyeranda xüsusi iz qoyub?
- Əvvəl formasını geyindiyim klublarımın hər birində xoş günlər keçirmişəm. "Keşlə" ilə Azərbaycan futbolunda tanınmışam, "Qəbələ" ilə ölkə kubokunu qazannışam. Hazırda "Araz-Naxçıvan"ın şərəfini qoruyuram. Bu klubu mənim üçün dəyərli edənlərdən biri də Zaur Axundovdu. Onu "Keşlə"dən tanıyıram. Ümid edir, inanıram ki, Naxçıvan təmsilçisini Azərbaycanın ən yaxşı və güclü komandalarından birinə çevirəcək. Nə qədər ki, burdayam klubum üçün əlimdən gələnin ən yaxşısı etməyə çalışacam.
- Zaur Axundovu klub rəhbəri kimi necə xarakterizə edərdin?
- Onu yaxşı insan kimi tanıyıram. Zaur bəy həmişə futbolçulara qayğı göstərən, can yandıran prezidentlərdəndir. Mənim də "Araz-Naxçıvan"a gəlməyimdə onun rolu olub. Belə ki, təklif gələndə Zaur Axundovun adını eşidincə, razılıq verdim. Qısası, biz futbolçular prezidentimizdən, prezidentimiz də bizdən razıdır.
ABDULLA İSMAYILOĞLU
