Idman.biz
"Bu, bizim yeni mövsümdə ilk rəsmi matçımız idi və yaxşı oyun göstərdik".
İdman.biz xəbər verir ki, bu fikirləri AZƏRTAC-a açıqlamasında "Araz-Naxçıvan" klubunun braziliyalı yarımmüdafiəçisi Felipe Santos UEFA Avropa Konfrans Liqasının II təsnifat mərhələsində Yunanıstanın "Aris" klubuna 2:1 hesabı ilə qalib gəldikləri ilk oyun barədə danışarkən deyib.
Santos qələbəyə görə xoşbəxt olduğunu bildirib: "Komandamız əzmkar mübarizə apardı. "Araz-Naxçıvan"ın avrokuboklarda ilk qolunu vurduğuma görə çox sevincliyəm. Əsas olan komandamın meydanı qələbə ilə tərk etməsi idi və bunu da bacardıq. İndi özümüzü toparlayıb cavab matçında da uğurlu nəticə qazanmaq istəyirik. Rəqibin güclü tərəfləri var, amma mərhələni keçmək üçün əlimizdən gələni edəcəyik".
Braziliyalı futbolçu Konfrans Liqasında daha irəli getmək istədiklərini də vurğulayıb: "Bizim bunu bacaracaq komandamız var. Sadəcə, xarakterimizi qoruyub saxlamalıyıq. İnanıram ki, Yunanıstanda da qələbə qazanıb Azərbaycana tarixi zəfərlə dönəcəyik".
Qeyd edək ki, komandalar arasında cavab görüşü iyulun 31-də Yunanıstanda keçiriləcək.
İdman.biz
