Idman.biz
"Vacib görüş idi. Üçüncü yeri təmin etmək üçün 1 xal qazanmaq lazım idi. Yaxşı oynadıq. Matça çox ciddi köklənmişdik. Yekunda da qalib gəldik. Avropaya gedirik".
İdman.biz xəbər verir ki, Futbolxeber.az-a açıqlamasında bu sözləri "Araz-Naxçıvan"ın yarımmüdafiəçisi Felipe Santos Azərbaycan Premyer Liqasının 35-ci turunda "Şamaxı"ya 1:0 hesabı ilə qalib gəldikləri oyun barədə danışarkən deyib.
Səfər matçının 63-cü dəqiqəsində zədə səbəbindən meydanı tərk etməli olan braziliyalı futbolçu durumuna belə aydınlıq gətirib: "Zədəm ciddi deyil. Oyunu davam etdirsəydim, vəziyyət daha da pis ola bilərdi. Ona görə də əvəzlənməm məsləhət oldu. İnanıram ki, növbəti matça qədər hazır olacağam".
O, "Araz-Naxçıvan"ın böyük uğura imza atdığını vurğulayıb: "Bu, klub üçün tarixdir. Komanda ilk dəfə avrokuboklara qatılacaq".
Santos vurğulayıb ki, hazırda Konfrans Liqası barədə düşünmək üçün tezdkir: "Qarşıda hələ bir oyunumuz var. Mövsümün son matçında "Zirə"yə qalib gəlmək istəyirik. Yalnız ondan sonra avrokuboklar barədə düşünmək olar. Avropada uğur qazanmaq üçün heyətimiz güclənməlidir".
İdman.biz
