Felipe Santos: "Aris"ə qarşı əla oyunlar göstərəcəyik

"Araz-Naxçıvan"ın braziliyalı yarımmüdafiəçisi Felipe Santosun futbolinfo.az saytına müsahibəsi

- "Araz-Naxçıvan"la yeni müqavilə barədə danışığınız nə yerdə qaldı? Narazılığınız maddi məsələ ilə bağlıdır?

- Yeni mövsümü də "Araz-Naxçıvan"da keçirəcəyəm. Mən peşəkaram və verdiyim sözə sadiq bir insanam.
Hazırlıq prosesi necə gedir? Komandanız indiki məqamda neçə faiz hazırdır və tam hazır vəziyyətə gəlməyiniz üçün nə qədər zamana ehtiyacınız var?
Konfrans Liqasındakı oyunlarımıza hazırlaşırıq. Komandanın hazırlıq səviyyəsi gündən-günə daha da yaxşılaşır. Hər gün irəliyə doğru addım atırıq. Özümüzü əla hiss edirik, yeni oyunçularla da münasibətlər qaydasındadır. Bir sözlə, hər şey plana uyğun davam edir.

- Heyətdə dəyişikliklər baş verib, komandadan gedənlər və yeni gələnlər var. Bu dəyişikliklər "Araz-Naxçıvan"a necə təsir edəcək? Yeni transferlərin səviyyəsi ürəyinizcədir?

- Yeni gələnlər əla futbolçulardır. Əminəm ki, onların komandamıza çox xeyri dəyəcək. Keçən mövsümdəkindən daha güclü "Araz-Naxçıvan" görəcəksiniz.

- "Araz-Naxçıvan"ın Konfrans Liqasında "Aris"lə keçirəcəyi oyunlardakı şansını necə dəyərləndirirsiniz? Avrokubokda debüt etmək, təcrübəsizlik komandanıza problem yarada bilərmi?

- Bu, klubun Avropada ilk çıxışıdır. Lakin komandamızda olan əksər futbolçular artıq avrokuboklarda oynamış şəxslərdir. İnanıram ki, "Aris"ə qarşı əla oyunlar göstərəcəyik, növbəti mərhələyə vəsiqə qazanmağa çalışacağıq. Hesab edirəm ki, avrokuboklara yanaşma tərzimiz hamını yaxşı mənada təəccübləndirdi.

- "Araz-Naxçıvan" hansı komponentlərin hesabına favorit sayılan "Aris"i mübarizədən kənarlaşdıra bilər?

- Futbol 11 nəfərin 11 nəfərə qarşı oyunudur. Bizim həlledici, aparıcı futbolçularımız var. Meydana tam olaraq oyuna fokuslanmış və hazır vəziyyətdə, özünəinam hissi ilə daxil olsaq, mərhələni adlayacağımıza əminəm.

- Azərbaycanlı azarkeşlər növbəti mövsümdə sonadək "Qarabağ"la çempionluq mübarizəsi apara biləcək komanda görmək istəyirlər. "Araz-Naxçıvan" bu missiyanı üzərinə götürməyə hazırdır?

- Keçən mövsüm "Araz-Naxçıvan" digər komandalar üçün çox çətinliklər yaratdı. İnanıram ki, yeni sezonda daha yaxşı çıxış edəcəyik. Digər komanda və ya komandalar favorit sayıla bilərlər, amma biz hər oyunda əlimizdən gələni edəcəyik ki, keçən mövsümdən daha yaxşı nəticəyə imza ataq.

İdman.biz