Sport24.az
"Çətin oyun olacağını bilirdik". Bu sözləri Sport24.az-a "Turan Tovuz"un futbolçusu Faiq Hacıyev deyib.
25 yaşlı müdafiəçi səfərdə "Şamaxı"ya 1:0 hesabı ilə qalib gəldikləri Misli Premyer Liqasının XXIV turunun matçı ilə bağlı fikirlərini bölüşüb:
"Hava şəraiti də oynamağımıza çətinlik yaradırdı. Şükürlər olsun, buna baxmayaraq, qələbə qazanmağı bacardıq".
Hacıyev qarşılaşmanın canlı yayımlanmamasının meydanda futbolçulara təsir etdiyini söyləyib: "Əlbəttə. Hər halda oyun başlamazdan əvvəl insanın içində narahatlıq olur. Amma baş hakim matçı çox yaxşı idarə etdi".
Oyunçu hazırda çempionatda avrokuboklar uğrunda mübarizənin davam etdiyini sözlərinə əlavə edib: "Biz də sonadək bu mübarizənin içində olmağa çalışacağıq. Ümid edirəm ki, mövsümün sonunda məqsədimizə çatacağıq".
O, XXV turda "Zirə"yə qarşı keçirəcəkləri görüşə də toxunub: "Hər oyunun bizim üçün çətin keçdiyini deyə bilərəm. "Zirə" ilə matç isə avrokuboklar uğrunda vacib qarşılaşmalardan biridir. Daha əvvəlkilərində olduğu kimi bu dəfə də meydana qələbə qazanmaq üçün çıxacağıq".
