Idman.biz
"Futbolda sona qədər gözləmək lazımdır ki, boşluq olan kimi ondan yararlanasan. Bizim də fərqləndiyimiz epizod həmin anlardan biri idi".
İdman.biz xəbər verir ki, bu sözləri Futbolinfo.az-a açıqlamasında "Turan Tovuz"un futbolçusu Faiq Hacıyev deyib.
26 yaşlı müdafiəçi səfərdə "Neftçi"yə qarşı əldə olunan qələbəni (1:0) dəyərləndirib: "Çox gərgin oyun keçdi. Son saniyəyə qədər mübarizə apardıq. Erkən qol müdafiədə daha diqqətli olmağımıza və qələbə qazanmağımıza səbəb oldu. Hər kəsə, xüsusilə də azarkeşlərə təşəkkürümü bildirirəm. Stadionumuzun təmirdə olmasına baxmayaraq, bizi yalnız buraxmırlar. Onlar sayəsində səfərdə olduğumuzu unuduruq. İnşallah, gələn qarşılaşmalarda da bunun davamını gətirərək qələbələr qazanıb, yuxarı pillələrdə qərarlaşarıq".
Hacıyev komandanın hücum xətti barədə də danışıb: "Son üç oyunun hər birində yalnız bir qol vurmuşuq. Bunun üzərində işləyirik ki, daha çox qollar vuraq. Lakin əsas olan qələbədir. Bunun üçün bütün gücümüzlə çalışırıq".
