Idman.biz
"Turan Tovuz"un müdafiəçisi Faiq Hacıyevin Futbolinfo.az saytına müsahibəsi
– 2024/2025 mövsümünü "Turan Tovuz" üçün necə dəyərləndirirsiniz? Avrokuboklardan kənarda qalmağınız sizə necə təsir etdi?
– Mövsümü ümumilikdə yaxşı dəyərləndirərdim. Düzdür, daha yaxşı nəticəyə imza ata bilərdik. Gələcək mövsüm üçün böyük təcrübə topladıq. Əlbəttə ki, avrokuboklarda iştirak etmək istəyirdik. Alınmadı, artıq irəliyə baxmalıyıq. Gələcək üçün planlar qurub daha güclü "Turan Tovuz"u hər kəsə göstərməliyik.
– "Turan Tovuz"un avrokuboklara vəsiqə qazanması üçün nə çatışmadı? Komanda nəyə görə istəyinə çatmadı?
– Mövsümə yaxşı başlamışdıq. Deyərdim ki, ən böyük problem qışdan sonra stabilliyi qoruya bilməməyimiz oldu.
– Klub rəhbərliyi 9 futbolçu – İvan Konovalov, Alexandro Serrano, Kauan Martins de Paula, Eltun Turabov, Kristian da Silva, İsmayıl Zülfüqarlı, Araş Qadiri, Anton Kraçkovski və Sadiq Quliyevlə yolları ayırdı. Bu oyunçulardan kimlərin gedişinə daha çox üzüldünüz?
– Bəzi futbolçularla 3 il, bəziləri ilə 1 il və daha az müddətdə bir yerdə olsaq da, ailə ortamı var idi. Bu mənada, adam hər birinin gedişinə üzülür. Amma bu, futboldur və futbolda belə şeylərə hazır olmalısan. Bizimlə yolları ayrılan hər bir futbolçuya uğurlar arzu edirəm.
– Başa çatan mövsümdə ən çox üzüldüyünüz oyun hansı oldu?
– Sırf hansısa oyunu deməzdim. Xal itirdiyimiz bütün matçlarda üzüldüm. Çünki hər xal itkisi səni irəliləməyə qoymur.
– Növbəti mövsümdə "Turan Tovuz"dan gözləntiniz nədir? Sizcə, bu mövsüm bacarmadığınızı yeni sezonda reallaşdıra biləcəksiniz?
– Gözləntiləri hər zaman yüksək tutmağı sevirəm. Növbəti mövsümə də böyük hədəflərlə başlamağa, yüksək yerlər uğrunda mübarizə aparmağa çalışacağıq.
– "Turan Tovuz"un əsas heyət üzvlərindən biri olaraq, millinin son toplanışına dəvət gözləyirdiniz? Yığmaya çağırılmamaq, heyətdən kənarda qalmaq sizə necə təsir etdi və bunun səbəbini nədə görürsünüz?
– Əlbəttə ki, milli formanı geyinmək mənim də arzularımdan biridir. İnşallah, bir gün buna nail olaram. Daha çox çalışaraq o formaya layiq olduğumu hər kəsə göstərməliyəm.
İdman.biz
