Sport24.az
İngiltərə VI liqasında çıxış edən "Maklsfild"in sahibi Rob Smetherst, FA Kubokunun 1/32 final mərhələsində "Kristal Pelas" üzərində qazanılan 2-1 hesablı qələbə ilə bağlı təəssüratlarını bölüşdü. Sport24.az xəbər verir ki, klub prezidenti bununla bağlı "Daily Mail"ə açıqlama verib:
"Bu inanılmazdır! Dilim tutulub, bu, inanılmazdır! Beş il əvvəl klubu alanda bunu təsəvvür belə edə bilməzdim. Klubu dörd günlük içki məclisindən sonra "Rightmove"dən (Britaniya onlayn əmlak portalı - red.) aldım və indi baxın haradayıq. Uşaqlar üçün İbizaya səfər planlaşdırmışam. Amma indi yox, mövsüm bitdikdən sonra".
Qeyd edək ki, 48 yaşlı iş adamı nəqliyyat logistika tətbiqi sayəsində sərvət qazanıb. Lakin koronavirusun başlaması ilə onun biznesi çöküb.
