Idman.biz
"İmişli"nin futbolçusu Ezekiel Morqanın futbolinfo.az saytına müsahibəsi
– Son matçda çempionluğa iddialı "Neftçi" ilə heç-heçə etdiniz. Bunu gözləyirdiz?
– Düzünü desək, çempionatın əsas favoritlərindən biri olan "Neftçi"yə qarşı oyunun gərgin keçəcəyini bilirdik. Bu səbəbdən oyuna ciddi və məqsədyönlü şəkildə hazırlaşmışdıq. Bu oyun həm əzmkarlığımızın, həm də özümüzə olan inamın göstəricisi oldu. Qarşıdakı matçlar üçün bizə əlavə güvən və motivasiya qazandırdı.
– Ümumiyyətlə, "İmişli" Premyer Liqaya – gözlənilənlərin əksinə – yaxşı mübarizə ilə başlayıb. Komandanın əsas motivasiyası nədir?
– Premyer Liqaya kifayət qədər döyüşkən və özünəinamlı bir start verdik. Əsas motivasiyamız isə "İmişli"ni təmsil etməyin verdiyi qürurdan qaynaqlanır. Biz burada təsadüfi deyilik və bunu sübut etmək istəyirik. Yeni formalaşmış komanda olaraq bizə qarşı müəyyən şübhələrin olması normaldır, amma bu şübhələr əksinə, bizi daha da gücləndirir. Məqsədimiz yalnız liqada qalmaq deyil, həm də layiqli mövqe uğrunda mübarizə aparmaqdır.
– Liqada konkret olaraq qarşınıza hansısa hədəf qoyulub, yoxsa sadəcə burada qalmaq barədə düşünürsünüz?
– Mənim məqsədim sadəcə liqada qalmaq deyil, daha böyük hədəflərim var. Bu mövsüm məqsədim həm qol vurmaq, həm də məhsuldar ötürmələrlə komandama liqada möhkəmlənməkdə kömək etməkdir.
– Növbəti turda daha bir iddialı komanda "Sabah"la qarşılaşacaqsız. Bu rəqibdən də xal almaq mümkün olacaq?
– "Sabah"la qarşılaşmanın asan olmayacağını bilirik. Rəqib güclü və təcrübəli komandadır. Amma biz meydanda öz potensialımızı göstərmək üçün əlimizdən gələni edəcəyik.
– Azərbaycan çempionatı ilk iki turdan sonra sənə necə təsir bağışladı?
– "İmişli"nin oyunçusu kimi Premyer Liqanın ilk iki turu mənim üçün dəyərli təcrübə oldu. Liqanın 12 komandaya genişlənməsi rəqabəti artırıb və bu dinamikanı meydanda aydın şəkildə hiss etmək olur. Bu səviyyədə oynamaq həm fərdi inkişaf, həm də komanda baxımından önəmli bir fürsətdir.
– "İmişli"nin doğma meydanda oynamaması komandaya təsir edir? Dolu tribunalar önündə daha fərqli şeylər mümkündür?
– Hazırda ev oyunlarımızı İmişlidən kənarda keçirməyimiz, əlbəttə, fərqli bir təcrübədir. Doğma azarkeşlərin qarşısında oynamaq hər bir futbolçu üçün xüsusi motivasiyadır və biz onların dəstəyini hər zaman hiss edirik. Hazırda əlimizdən gələnin ən yaxşısını etməyə çalışırıq.
– Azərbaycan Premyer Liqasında digər komandalar haqqında məlumatların necədir və hansı komanda sizə çox güclü görünür?
– İlk iki turdan sonra Premyer Liqada rəqabətin səviyyəsini açıq şəkildə hiss etmək mümkündür. Liqanın 12 komandaya genişlənməsi həm təcrübəli favoritlərin, həm də bizim kimi iddialı yeni komandaların mübarizəsini bir araya gətirib. Bu balanslı və rəngarəng rəqabət mübarizəni daha maraqlı və dinamik edir.
İdman.biz
