Sport24.az
UEFA Avropa Liqasının Liqa mərhələsinin V turu çərçivəsində keçiriləcək "Qarabağ" – "Lion" (Fransa) matçından öncə təşkil ediləcək mətbuat konfransları və media nümayəndələri üçün açıq məşqlərin vaxtları məlum olub. Sport24.az xəbər verir ki, "atlılar"ın baş məşqçisi Qurban Qurbanovun iştirakı ilə keçiriləcək mətbuat konfransı noyabrın 27-də saat 13:00-da Tofiq Bəhramov adına Respublika stadionunda baş tutacaq.
16:45-də isə media nümayəndələri üçün açıq məşq (ilk 15 dəqiqə) "Azersun Arena"da keçiriləcək.
Qonaq komandanın baş məşqçisi Pyer Saqenin Tofiq Bəhramov adına Respublika stadionunda təşkil olunacaq mətbuat konfransı saat 17:45-də start götürəcək. Fransa təmsilçisinin ilk 15 dəqiqəsi açıq olacaq məşqi 18:30-da başlayacaq.
Media mənsubları akkreditasiyalarını noyabrın 27-si saat 10:00-dan 12:30-dək Tofiq Bəhramov adına Respublika stadionunun media mərkəzindən götürə bilərlər.
Qeyd edək ki, noyabrın 28-də keçiriləcək "Qarabağ" – "Lion" görüşü saat 21:45-də başlayacaq.
